Xususiy klinikalarga organ ko‘chirib o‘tkazishga ruxsat berilishi mumkin

O‘zbekistonda xususiy tibbiyot muassasalariga transplantatsiya amaliyotini amalga oshirishga ruxsat berish taklifi muhokama qilinmoqda. Bu haqda 15-iyul kuni Savdo-sanoat palatasida sog‘liqni saqlash sohasi vakillari bilan o‘tkazilgan ochiq muloqot chog‘ida ma’lum qilindi.

 

Qashqadaryo viloyati sog‘liqni saqlash boshqarmasi rahbari Alisher Boboyevning bildirishicha, prezident qarori loyihasi ishlab chiqilgan bo‘lib, u hozirda tegishli vazirlik va idoralar bilan kelishilmoqda. Loyihaga ko‘ra, xususiy klinikalarga organ ko‘chirib o‘tkazish operatsiyalarini bajarishga ruxsat berilishi mumkin. Hujjatning e’lon qilinishi yaqin 2-3 hafta ichida kutilmoqda.

 

Central Asian Medical University rektori Nurillo Mamasodiqov bu tashabbusni qo‘llab-quvvatlab, har yili yuzlab bemorlar davolanish uchun xorijga chiqishga majbur bo‘layotganini, biroq ularning yarmi moliyaviy imkoniyatsizlik sabab O‘zbekistonda qolib ketayotganini ta’kidladi.

 

Sog‘liqni saqlash vazirligi huzuridagi Litsenziyalash, akkreditatsiyalash va tibbiy turizmni rivojlantirish boshqarmasi boshlig‘i Jaloliddin Asamutdinov transplantologiyani xususiy sektorga bosqichma-bosqich ochish muhimligini aytib o‘tdi. Dastlab, kam xavfli va murakkab bo‘lmagan operatsiyalarga ruxsat berilishi, keyinchalik esa to‘liq huquqli transplantatsiya xizmatlari ko‘rsatishga o‘tilishi rejalashtirilgan.

 

Uning aytishicha, transplantologiya yuqori texnologik infratuzilma, genetik tadqiqotlar va laborator diagnostika talab etadigan murakkab yo‘nalish bo‘lib, bu borada qonunchilik bazasini ham bosqichma-bosqich yangilash zarur.

 

Hozirda O‘zbekistonda transplantatsiya faqat davlat tibbiyot muassasalarida amalga oshiriladi. Amaldagi qonunchilikka ko‘ra, donorlik faqat tirik odam yoki murda shaxs asosida ruxsat etilgan bo‘lib, muassasalar ro‘yxatini Vazirlar Mahkamasi tasdiqlaydi.