Toshkentda yo‘lovchilar metroning issiqligidan shikoyat qilmoqda
Tarmoqda tarqalgan videomurojaatga rasmiylar izoh berdi.
Ijtimoiy tarmoqlarda Toshkentda metropoliten vagonlarida havoning issiqligi yuzasidan shikoyat qilgan yo‘lovchining murojaati keng tarqalmoqda. Holat yuzasidan “Toshkent metropoliteni” DUK axborot xizmati rasmiy munosabat bildirdi.
Qayd etilishicha, yangi turdagi poyezdlar barcha zamon talablari asosida ishlab chiqarilgan bo‘lib, yozning jaziramasida maxsus sovitish va sovuq kunlarda o‘zining isitish kabi ko‘plab qulayliklariga ega.
Internetdagi videomurojaatda taʼkidlangan harakat tarkibi ko‘p yillik foydalanilayotgan eski turdagi harakat tarkibi bo‘lib, ishlab chiqaruvchi tomonidan maxsus sovitish tizimi mavjud bo‘lmagan holda ishlangan va bu turdagi qurilma bilan jihozlash imkonsiz.
Taʼkidlanishicha, xizmat ko‘rsatish sifatini oshirish maqsadida yangi harakat tarkiblari xaridi yo‘lga qo‘yilgan va jarayon davomiy tarzda amalga oshiriladi. Buning natijasida bosqichma-bosqich ravishda metro vagon parkidagi poyezdlar yangilanishi rejalangan.
