“Dinini unutib, daraxtga e’tiqod qilishni boshlab yubormasaydi…” Alisher Qodirov daraxt kesilishiga qarshi chiqayotganlarga munosabat bildirdi
Kuni kecha tadbirkor Murod Nazarovning daraxtlar kesilishiga qo’yilgan cheklovni olib tashlash teklifi ortidan keskin muhokamalar boshlanib ketdi. Deputat Javlon Abdullayev “agar cheklov bo’lmaganida allaqachon cho’lga aylangan bo’lardik” deya deputat taklifiga qarshi chiqqan.
Toshkent shahrida qurilish jarayonlarida daraxt kesishga qo‘yilgan cheklovni olib tashlash bo‘yicha tadbirkor Murod Nazarov ilgari surgan taklif keng jamoatchilik va deputatlar orasida muhokamaga sabab bo‘ldi.
Murod Nazarov fikricha, baribir ayrim hollarda daraxtlar kesilmoqda, shu sababli, kesilishi mumkin bo‘lgan daraxtlar o‘rniga oldindan bir necha baravar ko‘proq daraxt ekish tizimini joriy etish kerak. Shu orqali qurilish ishlari davom etishi bilan birga, atrof-muhitga yetkaziladigan zarar ham kamayadi, deya ta’kidlaydi tadbirkor.
Ushbu taklifga O‘zbekiston Oliy Majlisi Qonunchilik palatasi deputati Javlon Abdullaev o‘z munosabatini bildirib, bu borada ehtiyotkorlikka chaqirgan. Deputatning so‘zlariga ko‘ra, bugungi kunda suv tanqisligi va global isish kabi muammolar kundan-kunga kuchayib bormoqda va har bir daraxtni asrash kelajak avlod uchun zarur.
“Bitta daraxtni katta qilib, o'stirish uchun o‘n yillab vaqt va doimiy parvarish kerak. Yettimish yillik daraxtni bir kunda kesib tashlash mumkin, lekin uni qayta tiklash juda qiyin. Shu sababli, hozir amalda bo‘lgan moratoriy (daraxt kesishga vaqtincha taqiq) juda muhim”, – degan Abdullaev.
Milliy Tiklanish Demokratik Partiyasi yetakchisi, deputat Alisher Qodirov ham bu borada o'z fikrini bildirdi. Qodirov daraxt kesishga mutlaqo qarshi bo‘lish ham to‘g‘ri emasligini ta’kidladi.
“Ba’zan zarurat bo‘lsa, zararli yoki qurt yeb bitirgan daraxtni olib tashlashga bir yil vaqt ketadi. Hammamiz bir-birimizga solamiz. Daraxt kesish uchun kelganlarni ko‘rib, yig‘laysanmi yoki kulasanmi, bilmaysan – go‘yoki odamni dorga osishga kelishgandek”, – dedi Qodirov.
Uning fikricha, daraxtlar kerak, lekin ularni inson manfaatini e’tiborga olib asrash lozim.
“Daraxtni himoya qilganimizdek, suv, yer, energiya, oziq-ovqat va vaqtni ham isrof qilmaslik uchun birlashsak edi. Kelajak avlod daraxtga sig‘inib yuborishidan ham ehtiyot bo‘lish kerak”, – deya qo‘shimcha qildi Qodirov.
Bu masala jamiyatda keng muhokamaga sabab bo‘layotganining asosiy sababi – qurilish rivojlanishi va ekologik muhofaza o‘rtasidagi nozik muvozanat. Bunda hokimiyat, tadbirkorlar va atrof-muhit himoyachilari o‘zaro kelishuvga kelishi muhim bo‘lib qolmoqda.
