Yaqin oylarda Ukraina Prezidenti almashishi mumkin
AQSH Zelenskiyning o‘rniga boshqa nomzod ko‘rmoqda.
Jurnalist Seymur Xersh Vashingtondagi manbalarga tayanib, Ukrainaning Buyuk Britaniyadagi elchisi va Ukraina armiyasining sobiq bosh qo‘mondoni Valeriy Zalujniy Ukrainaning navbatdagi prezidenti bo‘lishi mumkinligini maʼlum qildi. Uning so‘zlariga ko‘ra, u bir necha oy ichida Vladimir Zelenskiyning o‘rnini egallashi mumkin.
Jurnalistning qo‘shimcha qilishicha, agar AQSH prezidenti Donald Tramp shunday qaror qabul qilsa, Vladimir Zelenskiy o‘z lavozimini tark etadi. Jurnalistning suhbatdoshlaridan biri esa janob Zelenskiy “zo‘rlik bilan” lavozimidan chetlatilishi mumkinligini aytdi.
“Qo‘shma Shtatlar Ukrainaning amaldagi rahbarini o‘z xohishi bilan ketishga majburlashi mumkin. Zalujniy hozir Zelenskiyning o‘rniga eng ishonchli voris sifatida ko‘rilmoqda”, deb yozadi jurnalist o‘z maqolasida.
Eslatib o‘tamiz, Zelenskiyning vakolat muddati o‘tgan yilning 20 mayida tugagandi. Ukrainada 2024 yilgi prezidentlik saylovlari harbiy holat va umumiy safarbarlik sabab bekor qilingan.
