Navoiy shahrini qoplagan oq tutun bo‘yicha rasmiy ma’lumot: havoda zararli gazlar aniqlandi
“Navoiyazot” atrofida zararli moddalar normadan oshdi — Ekologiya boshqarmasi rasmiy tahlil natijalarini e’lon qildi.
Kuni kecha ijtimoiy tarmoqlarda erta tongda Navoiy shahrini oq, changsimon tutun qoplagani haqida videolar va fotomateriallar tarqaldi. Holat bo‘yicha fuqarolar tomonidan “Navoiyazot” aksiyadorlik jamiyatining faoliyati bilan bog‘liq taxminlar ilgari surildi.
Mazkur vaziyatga aniqlik kiritish maqsadida Ekologiya, atrof-muhitni muhofaza qilish va iqlim o‘zgarishi bo‘yicha Navoiy viloyat boshqarmasi tomonidan havo namunalari olingan va laboratoriya tahlillari o‘tkazilgan.
Soat 07:00 dan 09:00 gacha bo‘lgan oraliqda “Navoiyazot” AJ atrofidan olingan namunalarda quyidagilar aniqlangan:
Ammiak — me’yordan 1,4 baravar yuqori;
Vodorod sulfidi — 16,8 baravar yuqori.
Shuningdek, Zulfiyaxonim ko‘chasidagi monitoring postida olingan natijalarda:
Uglerod ikki oksidi — 1,04 baravar;
Ammiak — 1,1 baravar me’yordan yuqori bo‘lgani qayd etilgan.
Rasmiy xabarga ko‘ra, hozirda “Navoiyazot” AJ faoliyatidagi texnik va ekologik kamchiliklar hamda ehtimoliy qonunbuzarliklarni aniqlash maqsadida maxsus tekshiruv tayyorlanmoqda. Mazkur jarayonda nazorat organlari va tegishli mutaxassislar ishtirokida huquqiy chora-tadbirlar belgilanadi.
