7 yillik tanaffusdan keyin Samarqand va Dushanbe o'rtasida muntazam aviaqatnovlar yo‘lga qo‘yiladi
Bu yo‘nalishdagi so‘nggi parvozlar 2018-yilda amalga oshirilgan.
O‘zbekistonning Centrum Air aviakompaniyasi Toshkent—Dushanbe—Toshkent hamda Samarqand—Dushanbe—Samarqand yo‘nalishlarida muntazam aviaqatnovlarni yo‘lga qo‘ydi.
Toshkent—Dushanbe—Toshkent parvozi 19-iyuldan boshlab haftasiga ikki marta — chorshanba va shanba kunlari amalga oshiriladi. Chipta narxi 653 ming so‘mdan boshlanadi.
Samarqand—Dushanbe—Samarqand yo‘nalishida esa 20-iyuldan boshlab muntazam reyslar qayta tiklandi. Parvozlar payshanba va yakshanba kunlari amalga oshiriladi. Ushbu yo‘nalishdagi chipta narxi 608 ming so‘mdan boshlanadi.
Parvozlar O‘zbekiston va Tojikiston hukumatlari o‘rtasida 2018-yil 9-mart kuni imzolangan havo qatnovi bo‘yicha bitim asosida tashkil etilgan.
Bundan tashqari, ushbu yo‘nalishda Somon Air va Uzbekistan Airways aviakompaniyalari ham parvozlarni amalga oshiradi.
Tojikiston hukumati 2025-yil 12-iyun kuni “Ochiq osmon” siyosatini e’lon qilgan. Bu qaror xorijiy va mahalliy aviakompaniyalar o‘rtasidagi parvozlar sonini tenglashtirish bo‘yicha avvalgi cheklovlarni bekor qiladi va raqobatni erkinlashtiradi.
Eslatib o‘tamiz, O‘zbekiston va Tojikiston shaharlari o‘rtasidagi aviaqatnovlar 1992-yilda to‘xtatilgan va 2017-yilda qayta tiklangan edi. Samarqand—Dushanbe yo‘nalishida so‘nggi parvozlar 2018-yilda amalga oshirilgan bo‘lsa-da, keyinchalik to‘xtatilgan edi. Endilikda ushbu reyslar ham qayta tiklandi.
