O‘zbekistonda 97 foiz aholi raqamli ko‘nikmalarni muvaffaqiyat kaliti deb hisoblaydi
IT forumi doirasida e’lon qilingan tadqiqot natijalari raqamli savodxonlik, onlayn xizmatlar va istiqbolli IT kasblar borasida muhim ko‘rsatkichlarni ochiqladi.
O‘zbekistonda raqamli savodxonlikni oshirish va IT sohasini rivojlantirish bo‘yicha o‘tkazilgan yirik tadqiqot natijalari e’lon qilindi. So‘rovnoma natijalariga ko‘ra, aholining 97 foizi raqamli ko‘nikmalarni muvaffaqiyat kaliti deb biladi.
Tadqiqot 2025-yil mart–iyun oylarida butun mamlakat bo‘ylab o‘tkazildi va unda 4 mingdan ortiq fuqaro ishtirok etdi. Respondentlar orasida erkak va ayollarning ulushi deyarli teng bo‘lib, 50,7 foizini ayollar, 49,3 foizini erkaklar tashkil etdi.
So‘rovda ishtirok etganlarning 96 foizi IT sohasiga qiziqishini bildirgan. IT ko‘nikmalari darajasi bo‘yicha respondentlarning 17 foizi o‘zini a’lo, 44 foizi yaxshi, 32 foizi esa qoniqarli darajada deb baholadi.
Masofaviy ish va o‘qish bo‘yicha ham statistik ma’lumotlar aniqlandi. Respondentlarning 57 foizi har hafta videoaloqa vositalaridan foydalanishini bildirdi. Shuningdek, 78 foiz ishtirokchi har oy Elektron hukumat tizimlaridan foydalanadi.
Onlayn xarid qilish bo‘yicha so‘rov natijalariga ko‘ra, 52,4 foiz aholi oyiga 2-3 marta marketpleys va ijtimoiy tarmoqlar orqali xarid qiladi. 25 foiz aholi yiliga 2-3 marta onlayn xarid amalga oshiradi. 22 foiz respondent esa umuman onlayn xarid qilmaydi.
Forum davomida “Kelajak kasblari atlasi” taqdim etildi. Bu atlasda 45 ta istiqbolli IT kasbi belgilangan bo‘lib, u yoshlar, ota-onalar, ta’lim muassasalari va ish beruvchilarga amaliy yo‘nalish beradi.
Tadbirda DigiSurvey.uz onlayn platformasi ham ishga tushirildi. Bu platforma orqali tadqiqot natijalari markazlashtiriladi, bepul IT ta’lim resurslari joylashtiriladi va kasbiy yo‘naltirish imkoniyati yaratiladi.
Loyiha IT ta’lim uyushmasi va Shveysariya taraqqiyot va hamkorlik agentligi (SDC) hamkorligida amalga oshirilmoqda. Ishlar 2024-yil sentyabr oyida boshlangan bo‘lib, birinchi bosqichda aholining IT savodxonligi va malakasidagi bo‘shliqlar aniqlanmoqda. Keyingi bosqichlarda esa maxsus ta’lim dasturlari, o‘qituvchilar malakasini oshirish va talabalar uchun kasbiy ko‘mak mexanizmlari joriy qilinadi.
Forumda IT Park, Raqamli ta’limni rivojlantirish markazi, AlmaU va boshqa tashkilotlardan mutaxassislar ishtirok etdi. Panel muhokamalar, startaplar, innovatsiyalar, netvorking va interaktiv sessiyalar o‘tkazildi.
Tashkilotchilar qatorida O‘zbekiston Respublikasi Raqamli texnologiyalar vazirligi, IT Park O‘zbekiston, Raqamli ta’limni rivojlantirish markazi, O‘zbekiston nogironlar assotsiatsiyasi, IT Ladies hamjamiyati va Yoshlar ishlari agentligi ham bor.
