Buxoroda sotilayotgan ozdiruvchi qahvalar tarkibida kuchli taʼsir qiluvchi moddalar aniqlandi
Noqonuniy yo'l bilan chet eldan olib kelingan 100 ming donadan ortiq dorilar musodara qilindi.
G‘ijduvonda o‘tkazilgan tezkor tadbir davomida Davlat xavfsizlik xizmati va huquqni muhofaza qiluvchi organlar tarkibida kuchli ta’sir qiluvchi modda bo‘lgan ozdiruvchi kofelar va dorilarning noqonuniy savdosiga chek qo‘ydi. Bu haqda Zamon.uz'ga DXX xabar qilgan.
Buxoro viloyati Davlat xavfsizlik xizmati va Bosh prokuratura huzuridagi Departament tomonidan o‘tkazilgan reydda 1985-yilda tug‘ilgan, ilgari ham sudlangan fuqaroning uyi ko‘zdan kechirildi. Tekshiruv natijasida bojxona rasmiylashtiruvlaridan o‘tmagan va hujjatlari bo‘lmagan chet elda ishlab chiqarilgan turli xil ozdiruvchi kofelar va dorilar aniqlandi.
Jami musodara qilingan mahsulotlar soni 100 ming donadan ortiqni tashkil etdi. Aniqlangan mahsulotlar orasida quyidagilar bor: KETO COFFEE MIX SLIM COFFEE, SLT SLIM LUX COFFEE, HOODIA CACTUS SLIMMING COFFEE, SLIM GREEN COFFEE, NATURE COMPLEX LK FAT BURNING, LAO SE LON, FIT90 FAT BURNER, REDUKSIN LIGHT, TSINSISHOU PLUS va boshqa dori vositalari.
“Farmatsevtika mahsulotlari xavfsizligi markazi” DM xulosasiga ko‘ra, ushbu mahsulotlar tarkibida sibutramin moddasi mavjud. Sibutramin O‘zbekiston Vazirlar Mahkamasining 2019-yildagi 818-sonli qaroriga asosan kuchli ta’sir qiluvchi moddalarga kiritilgan.
Mazkur holat yuzasidan fuqaro haqida Jinoyat kodeksining 251-1 moddasi 5-qismi bilan jinoyat ishi qo‘zg‘atildi. Hozirda tergov ishlari olib borilmoqda. Dorilar va kofelar xorijdan qanday olib kirilgani aniqlanmoqda.
