Telefonida taqiqlangan kanallarga obuna bo‘lgan o‘zbekistonliklar Rossiyaga kiritilmadi
Ayrim fuqarolar terrorchilik va radikal kanallarga obunasi sabab Rossiya chegarasidan o‘tkazilmayapti.
Rossiya chegara xizmati O‘zbekiston va Tojikiston fuqarolarining mobil qurilmalarida terroristik va ekstremistik tashkilotlar hamda radikal kanallarga obuna bo‘lish holatlarini aniqlagan taqdirda, ularning mamlakat hududiga kirishiga ruxsat bermayapti. Bu haqda TASS axborot agentligi 20 dan ortiq sud hujjatlariga tayanib xabar berdi.
TASS ma’lumotlariga ko‘ra, ayrim fuqarolarning telefonlarida terrorizm va ekstremizm targ‘iboti bilan bog‘liq kanallarga obunalar aniqlangan. Shuningdek, ayrim shaxslar Ukraina tarafini qo‘llab-quvvatlovchi kanallarga obuna bo‘lgani hamda Rossiya huquq-tartibot organlari xatti-harakatlarini tanqid qiluvchi yozishmalar saqlab qo‘yilgani aniqlangan. Ba’zi holatlarda esa fuqarolar chegaradan o‘tishdan oldin messenjerdagi yozishmalarni o‘chirib tashlashga uringan. Rossiya chegarachilari bu harakatlarni xavfsizlikka tahdid deb baholagan.
Xabarda qayd etilishicha, 2024-yil mart oyida Moskva yaqinidagi “Crocus City Hall” konsert zalida sodir etilgan teraktdan so‘ng Rossiya chet el fuqarolarini tekshirish choralarini kuchaytirgan. Ushbu hodisa bo‘yicha Tojikiston fuqarolari qo‘lga olingani ma’lum qilingan.
So‘nggi bir yarim yil ichida Tojikiston va O‘zbekistonning 20 dan ortiq fuqarosi Rossiyaga kirish taqiqi ustidan sudga shikoyat qilgan, biroq barcha holatlarda sud qarori rad etish tarafida bo‘lgan.
