Andijonda sotuvchisini kaltaklagan ayolga nisbatan jinoyat ishi qo‘zg‘atildi
Do‘kon egasi bo'lgan ayol qo'l ostida ishlovchi 20 yoshli qizni qarz masalasi sabab do‘pposlagan.
Ijtimoiy tarmoqlarda bir ayolning boshqa bir ayolga nisbatan zo‘ravonlik qilgan holatini aks ettirgan video keng tarqaldi. Holat yuzasidan rasmiylar tomonidan surishtiruv ishlari boshlangan.
Ma’lum bo‘lishicha, voqea Andijon shahrining “Hunarmand” mahallasida joylashgan kiyim do‘konida sodir bo‘lgan. Dastlabki ma’lumotlarga ko‘ra, 1992-yilda tug‘ilgan do‘kon egasi qarz masalasi sabab qo'l ostida ishlovchi, 2005-yilda tug‘ilgan sotuvchi qizni do‘pposlagan.
Hozirda ayolga nisbatan Jinoyat kodeksining 138-moddasi 2-qismi (zo‘rlik ishlatib, noqonuniy ravishda ozodlikdan mahrum qilish) bo‘yicha jinoyat ishi qo‘zg‘atildi. U gumonlanuvchi sifatida ushlangan.
Huquqni muhofaza qiluvchi organlar voqea yuzasidan tergov harakatlarini olib bormoqda.
