Ohangaronda YTHni rasmiylashtirish uchun borgan YPX mashinasini yuk avtomobili urib ketdi
Har ikki hodisa yuzasidan tegishli organlar tomonidan surishtiruv ishlari olib borilmoqda.
23-iyul kuni taxminan soat 05:00 larda Toshkent viloyati Ohangaron tumani hududidan o‘tgan A373 “Toshkent–O‘sh” avtomobil yo‘lining 39-kilometrida “Gentra” va “Cobalt” rusumli avtomobillar ishtirokida yo‘l-transport hodisasi sodir bo‘ldi. Hodisa oqibatida hech kim tan jarohati olmagan.
Voqea joyiga YPX xodimlari “Lasetti” rusumli xizmat avtomobilida yetib borishgan. Ular hodisani rasmiylashtirish va yo‘l harakati xavfsizligini ta’minlash maqsadida patrul mashinasini yonib turgan mayoqchalar bilan qatnov qismining o‘ng tomoniga joylashtirishgan.
Shu paytda 2001-yilda tug‘ilgan haydovchi boshqaruvidagi “HOWO” yuk mashinasi “Toshkent–Olmaliq” yo‘nalishida harakatlanayotgan bo‘lgan. Haydovchining tajribasizligi va e’tiborsizligi tufayli u YPX avtomobilining yon qismiga urilgan.
Mazkur holatda ham hech kim jarohat olmagan. Har ikki hodisa yuzasidan tegishli organlar tomonidan surishtiruv ishlari olib borilmoqda.
