180 dona iPhone’ni yashirib olib o‘tmoqchi bo‘lgan shaxslar qo‘lga olindi
Telefonlar fuqarolarning beliga va yuklariga yashirilgan.
Toshkent viloyati bojxona boshqarmasi xodimlari tomonidan o‘tkazilgan tezkor tadbir davomida “Navoiy” chegara bojxona posti orqali qiymati 1 milliard 80 million so‘mlik 180 dona iPhone telefonini noqonuniy ravishda olib kirishga uringan to‘rt nafar fuqaro aniqlanib, to‘xtatib qolindi. Bu haqda viloyat bojxona boshqarmasi matbuot xizmati xabar berdi.
Ma’lum qilinishicha, qo‘shni davlatdan piyoda ravishda kirib kelgan fuqarolar bojxona nazorati jarayonida ko‘zdan kechirilib, ularning bel qismiga va qo‘l yuklariga mobil telefonlar maxfiy tarzda joylashtirilgani fosh bo‘lgan.
Hozirda holat yuzasidan bojxona organlari tomonidan tergovga qadar surishtiruv ishlari olib borilmoqda.
