Islom sivilizatsiyasi markazi: Prezident tashabbusidagi buyuk loyiha yakuniga yetmoqda
Ayni paytda bino markaz ekspozitsiyasi va kontent bilan boyitilmoqda.
Prezident tashabbusi va g‘oyasi asosida barpo etilayotgan Islom sivilizatsiyasi markazi qurilishi yakuniy bosqichga yetib keldi. Ushbu muhtasham majmua nafaqat O‘zbekistonda, balki butun musulmon olamidagi eng yirik ilmiy-ma’rifiy markazlardan biriga aylanishi kutilmoqda. Hozirda bino qurilishi va ichki pardozlash ishlari deyarli yakunlangan bo‘lib, markaz ekspozitsiyasi va kontent bilan boyitilmoqda.
Markaz tarkibini boyitish borasida ommaviy axborot vositalari ham faol ishtirok etmoqda. Jumladan, “Sevimli” telekanali tashabbusi bilan 25 ta tarixiy obidaning maketi yaratilmoqda va markazga beg‘araz hadya qilinadi.
Telekanal direktori Jaloliddin Safoyevning so‘zlariga ko‘ra, maketlar ustida ish joriy yilning aprel oyida boshlangan va ular to‘liq tarixiy asos, ilmiy maslahatlar va me’moriy uslublar asosida tayyorlanmoqda.
“Prezidentimiz g‘oyasini amalga oshirishda o‘z hissamizni qo‘shish biz uchun sharaf. Maketlar ustida katta jamoa bilan ishlayapmiz, ularda nafaqat ko‘rinish, balki ilmiy va ma’naviy mazmun ham mujassam bo‘ladi,” — deydi Safoyev.
Markaz ekspozitsiyasining ajralmas qismi sifatida 59 ta maket yaratilishi rejalashtirilgan bo‘lib, ularning 24 tasi zamonaviy 3D formatda taqdim etiladi. Har bir maket tarixiy dalillar va ilmiy asoslar bilan ishlab chiqilmoqda. Ularning barchasi yuqori aniqlik, mukammal bezaklar va ishonchli arxitektura bilan ajralib turadi.
_1.webp)
Ma'lumot uchun: hozirda markaz binosida qurilish va ichki pardoz ishlari deyarli yakunlangan. Ayni damda asosiy e’tibor — ekspozitsiya va kontent bilan boyitish ishlariga qaratilgan. Mazkur ulkan loyiha ustida O‘zbekiston va xorijdan jalb qilingan 2000 ga yaqin olim, mutaxassis, dizayner, arxitektor va hunarmand faoliyat yuritmoqda.
Markaz doirasida 800 dan ortiq loyiha ustida ish olib borilmoqda. Ulardan 400 ga yaqin loyiha Prezident tomonidan ilgari surilgan “Sivilizatsiyalar, shaxslar, kashfiyotlar” konsepsiyasi asosida shakllantirilmoqda.
