Istanbulda Rossiya – Ukraina tinchlik muzokaralarining uchinchi raundi yakunlandi
Muzokaralar 40 daqiqa davom etdi va tomonlar bir qator gumanitar masalalarda kelishuvga erishdi.
Istanbul shahrida Rossiya va Ukraina o‘rtasida tinchlik muzokaralarining uchinchi raundi bo‘lib o‘tdi. Muzokaralar 40 daqiqa davom etdi va rus tilida olib borildi.
Tomonlar nafaqat harbiylar, balki tinch aholi vakillarini ham almashish bo‘yicha kelishib oldi.
Rossiya delegatsiyasi rahbari Vladimir Medinskiy muzokaralar yakunida quyidagi asosiy bayonotlarni berdi:
– Rossiya Ukraina tomoniga onlayn ishlaydigan uchta ishchi guruh tashkil etishni taklif qildi. Ukraina bu taklifni ko‘rib chiqishga rozilik bildirdi.
– Muzokaralarda Rossiya va Ukraina o‘z memorandumlarida ko‘rsatilgan pozitsiyalarni muhokama qildi. Hozirda bu pozitsiyalar o‘rtasida sezilarli tafovut mavjud.
– Davlat rahbarlari darajasidagi uchrashuvni tashkil etishdan oldin, u yerda qanday masalalar ko‘rib chiqilishi aniq bo‘lishi kerak. Prezidentlar uchrashuvi muzokaralarning yakuniy nuqtasi bo‘lishi kutilmoqda.
– Rossiya kamida 1200 nafar ukrainalik harbiy asirni almashishni taklif etdi.
– Yarador va halok bo‘lgan harbiylar jasadlarini yig‘ib olish uchun 24 yoki 48 soatlik o‘t ochishni to‘xtatish rejimi taklif qilindi.
– Ukraina tayyor bo‘lganidan so‘ng, Rossiya 3 ming nafar halok bo‘lgan ukrainalik harbiylarning jasadini topshirishga tayyorligini bildirdi.
– Kursk viloyatidan evakuatsiya qilingan, ammo hali qaytmagan 30 nafar fuqaro masalasida Ukraina ularning maqomini aniqlashtirishi kerak. Rossiya ularni harbiy asirlarga almashtirishga tayyor.
– Rossiyaga topshirilgan ukrainalik bolalar ro‘yxati bo‘yicha ishlar yakunlangan. Ularning ko‘pchiligi Rossiya hududida bo‘lmagan.
– Ikkinchi bosqichda erishilgan barcha gumanitar kelishuvlar bajarilgan.
– Rossiya tomon muzokaralarning to‘rtinchi raundi ham o‘tkazilishiga umid bildirdi.
