Chirchiq daryosidan noqonuniy shag‘al olgan mansabdor 6 yilga qamaldi
U rahbarlik qilgan MCHJ tabiatga katta miqdorda zarar yetkazgan.
Chirchiq daryosida noqonuniy qum-shag‘al qazib olgan mansabdor 6 yilga ozodlikdan mahrum etildi. Bu haqida Ekologiya vazirligi xabar bermoqda.
Qayd etilishicha, Toshkent viloyati Ekologiya, atrof-muhitni muhofaza qilish va iqlim o‘zgarishi boshqarmasi, viloyat prokuraturasi va huquqni muhofaza qilish organlari hamkorligida tungi reyd tadbiri o‘tkazilgan, unda Chirchiq daryosi muhofaza hududidan qum-shag‘al aralashmasi ortib berilayotganligi aniqlangan.
Holatga aniqlik kiritilganida qum-shag‘al aralashmasi G.S. MCHJ tegishli bo‘lgan tosh maydalash sexiga olib borib to‘kilayotganligi maʼlum bo‘lgan. Holat yuzasidan davlat inspektorlari tomonidan tabiatga katta miqdorda zarar yetkazganligi hisob-kitob qilingan va to‘plangan hujjatlar holatga huquqiy baho berish uchun huquqni muhofaza qilish organlariga yuborilgan.
Toshkent viloyati jinoyat ishlari bo‘yicha Oqqo‘rg‘on tuman sudi tomonidan G.S. MCHJ rahbari S.I. Jinoyat kodeksining tegishli moddalari bilan aybdor deb topilib, uzil-kesil o‘tash uchun 6 yil muddatga ozodlikdan mahrum etilgan. Jazoni umumiy tartibdagi koloniyalarda o‘tash belgilangan. Shuningdek, huquqbuzardan davlat foydasiga katta miqdorda zarar va jarima undirilishi belgilangan.
