Navoiyda havo ifloslanib ketganini jonli efirda aytgan jurnalistga bosim bo'layotgani rad etildi
Navoiy telekanalida jonli efirlarning vaqtincha to‘xtatilishi texnik ishlar bilan bog‘liq ekani, Ruxsora Boboqulovaga esa hech qanday bosim bo‘lmagani viloyat hokimligi tomonidan rasmiy ravishda ma’lum qilindi.
So‘nggi kunlarda ijtimoiy tarmoqlarda jurnalist Ruxsora Boboqulova tomonidan Navoiyning ekologik muammolari haqida bildirgan fikrlaridan so‘ng unga bosim bo‘layotgani, shuningdek, viloyat telekanalida jonli efirlar to‘xtatilgani haqidagi xabarlar tarqaldi.
Mazkur holatga aniqlik kiritish maqsadida Navoiy viloyati hokimligi Axborot xizmati rasmiy bayonot bilan chiqdi.
Unga ko‘ra, 2025-yil 23-iyul kuni viloyat telekanali studiyasida texnik jihozlarni yangilash va LED ekran o‘rnatish ishlari olib borilgan. Shu sababli kunning ikkinchi yarmida jonli efirlar vaqtincha to‘xtatilgan.
Texnik ishlar yakunlangach, 24-iyul kuni soat 18:00 da ochiq muloqot, 25-iyul kuni esa “Assalom, yangi kun!” tonggi dasturi 08:00 dan 10:00 gacha jonli efirda uzatildi.
Shuningdek, jurnalist Ruxsora Boboqulovaga hech qanday bosim yoki to‘siq qo‘yilmagani ta’kidlanmoqda. U hozirda ham o‘z ijodiy faoliyatini davom ettirmoqda. Rasmiy jadvalga ko‘ra, u haftaning seshanba va payshanba kunlari jonli efirlarda boshlovchilik qiladi.
