O’zbekiston prezidentini haqorat qilgan shaxs Ozarbayjondan Toshkentga olib kelindi
43 yoshli Yusupov Boku shahrida aniqlanib, vaqtincha qamoqqa olish chorasi qo‘llanilgan.
2025-yil aprel oyida Ozarbayjon hududida qo‘lga olingan O‘zbekiston fuqarosi Omonbek Yusupov xalqaro qidiruv asosida Toshkentga ekstraditsiya qilindi. U O‘zbekiston Respublikasi Prezidentining sha’ni va qadr-qimmatiga tajovuz qilganlikda ayblanmoqda.
Ozarbayjon Bosh prokuraturasining ma’lumotiga ko‘ra, 43 yoshli Yusupov Boku shahrida aniqlanib, vaqtincha qamoqqa olish chorasi qo‘llanilgan. Mazkur holat yuzasidan “Fuqarolik, oila va jinoyat ishlari bo‘yicha huquqiy yordam va munosabatlar to‘g‘risida”gi 2002-yil 7-oktabrdagi Konvensiyaga asosan Yusupovni O‘zbekistonga topshirish to‘g‘risida qaror chiqarilgan.
Ekstraditsiya Ozarbayjon Adliya vazirligining Penitensiar xizmati tomonidan tashkil etilgan maxsus konvoy orqali amalga oshirildi. O‘zbekiston Bosh prokuraturasi ta’kidlashicha, ayblanuvchining qaytarilishi mamlakat qonunchiligi ustuvorligini ta’minlash yo‘lidagi muhim qadam hisoblanadi.
Xabarlarga ko‘ra, xorijda jinoyat sodir etgan o‘zbekistonlik fuqarolarni izlab topish va ularni yurtga qaytarish choralari izchil davom ettirilmoqda. Bu esa O‘zbekiston fuqarolari tomonidan chet elda sodir etilgan noqonuniy harakatlar bepisand qoldirilmasligini yana bir bor tasdiqlaydi.
Qonunchilikka muvofiq, davlat rahbarining sha’nini kamsitish va haqorat qilish O‘zbekistonda og‘ir huquqbuzarlik hisoblanadi va u uchun qat’iy javobgarlik ko‘zda tutilgan. Bosh prokuratura ushbu holat fuqarolarni yuridik mas’uliyat va onlayn faoliyatdagi ehtiyotkorlikka undashini ta’kidladi.
Barcha protsessual harakatlar xalqaro huquqiy me’yorlar asosida olib borilgan bo‘lib, Yusupovga zaruriy huquqiy kafolatlar ta’minlangan.
