O‘zbekistonda 1-iyul holatiga ko‘ra, kambag‘allik darajasi 6,8 foizni tashkil qildi
Prezidentga bandlik va kasbiy ta’limga oid yangi yondashuvlar taqdim etildi.
25-iyul kuni O‘zbekiston Respublikasi Prezidenti Shavkat Mirziyoyev aholi bandligini oshirish va kasbiy ta’lim tizimida xorijiy tajriba asosida yo‘lga qo‘yilayotgan yangi yondashuvlar taqdimoti bilan tanishdi.
Joriy yil boshidan bandlik siyosatida mahalla va banklar o‘rtasida kooperatsiya yo‘lga qo‘yilib, natijada birinchi yarim yillikda 3 milliondan ortiq fuqaro daromadli mehnatga jalb qilindi. Shu bilan birga, 2025-yil 1-iyul holatiga ko'ra, aholining ijtimoiy himoyasi va daromadini oshirish orqali kambag'allik darajasi 6,8 foizga kamaygani qayd etildi.
Kasbiy ta’lim sifati bandlik darajasiga bevosita ta’sir qilmoqda. Hozirda malakali kadrlar yetishmovchiligi, kasbga yo‘naltirishdagi uzilishlar va xususiy sektor bilan hamkorlikning sustligi asosiy muammolar sifatida ko‘rsatildi. Ayniqsa, kasbiy o‘quv dasturlari mehnat bozori ehtiyojlariga to‘liq mos kelmasligi tanqid qilindi.
Taqdimotda quyidagi yangi tashabbuslar ilgari surildi:
Mehnat organlari ish beruvchilar uchun hamkor va xizmat ko‘rsatuvchi tizimga aylantiriladi.
Ish beruvchilarga bo‘sh ish o‘rinlari to‘g‘risida axborot bermaslik yoki yuborilgan nomzodni ishga qabul qilmaslik uchun qo‘llaniladigan jazolar bekor qilinadi.
Tashabbus sifatida Toshkent shahrida maxsus elektron platforma sinov tariqasida ishga tushiriladi, so‘ng butun respublikaga joriy qilinadi.
Muayyan vakansiyalar kasbiy ta’limning asosiy yo‘nalishlariga aylantirilib, o‘quv jarayonlari mehnat bozoriga bog‘lanadi.
Kasbiy ko‘nikmalar markazlariga xususiy sektor vakillari jalb etiladi, ayrim markazlar esa ixtisoslashtirilgan ta’lim muassasalariga aylantiriladi.
Kasbiy ta’limni uch bosqichli tizimga o‘tkazish rejalashtirilmoqda: bepul onlayn videodarslar, “kasb vaucheri” orqali qayta tayyorlash va malaka oshirish imkoniyatlari yo‘lga qo‘yiladi.
Prezident malakali kadrlar tayyorlash O‘zbekistonda ishsizlik va kambag‘allikni kamaytirishda eng muhim omil ekanini ta’kidladi.
