Xorazmda Uyg‘onish davri topilmalari aniqlandi
Ularning ayrimlari IX-XI asrlarga, boshqalari esa XVIII-XIX asrlarga tegishli.
Xorazm Maʼmun akademiyasi arxeologlari Uyg‘onish davri topilmalarini qo‘lga kiritdi. Bu haqida O‘zbekiston Respublikasi Fanlar Akademiyasi xabar bermoqda.
Ayni paytda Xorazm Maʼmun akademiyasi arxeologlari Bahrom Sadullayev rahbarligida Shovot tumanida joylashgan Kat-qalʼa yodgorligida arxeologik dala tadqiqot ishlarini amalga oshirmoqda.
Ushbu qadimiy inshoot qoldiqlarini ochish jarayonida yuqori qatlamlarda 20 dan ortiq chiqindi o‘ralar aniqlanib, ulardan 3 tasi IX-XI asrlarga, qolganlari XVIII-XIX asrlarga tegishlidir. Shulardan IX-XI asrlarga oid o‘ralar juda ko‘plab sirlangan va sirlanmagan sopol buyumlardan iborat noyob topilmalar kolleksiyasini taqdim etdi.
Topilmalar orasida shisha buyumlar va suyakka tushirilgan naqsh bezaklari ham hunarmandchilikning faqat kulolchilik tarmog‘i emas balki boshqa turlari ham Xorazmda keng yoyilganligidan dalolat beradi. Shisha buyumlarining yasalishi, sopol idishlarga va suyak qoldiqlariga berilgan bezaklar, ularning ishlanish uslubi o‘rta asrlarda Xorazm vohasida fayoliyat yuritgan usta hunarmandlarning yuksak darajadagi malaka sohibi bo‘lganliklaridan dalolat beradi.
