Toshkent viloyatida advokat pora bilan qo‘lga tushdi
U bundan oldin ham narkotik savdosi bilan sudlangan.
Toshkent viloyatida advokat 20 ming dollar pora olayotganda ushlandi. Bu haqda DXX axborot xizmati Zamon.uz‘ga maʼlum qildi.
Maʼlum bo‘lishicha, Toshkent viloyatida faoliyat yurituvchi advokatlik byurosi advokati jazoni ijro etish muassasasida jazo muddatini o‘tayotgan fuqaroni mansabdor tanishlari orqali ozodlikka chiqartirib berishini aytib, evaziga mahkumning turmush o‘rtog‘idan 30 ming AQSH dollari talab qilgan.
DXX va Bosh prokuratura huzuridagi IJQK Departamenti Toshkent shahar boshqarmasi hamkorligida o‘tkazilgan tezkor tadbirda advokat oldindan 20 ming AQSH dollarini olgan vaqtida ashyoviy dalillar bilan ushlangan.
Taʼkidlanishicha, ushbu advokat muqaddam giyohvandlik vositalari savdosi bilan bog‘liq jinoyati uchun sudlangan bo‘lib, bundan to‘g‘ri xulosa chiqarmagan.
Unga nisbatan Jinoyat Kodeksining 168-moddasi 4-qismi “a” bandi va 28,211-moddasi 3-qismi “a” bandi bilan jinoyat ishi qo‘zg‘atilib, qamoqqa olish tarzidagi extiyot chorasi qo‘llanildi. Tergov harakatlari olib borilmoqda.
