Samarqandda mashhur “qo‘ziqorin uy”ni buzish boshlandi
12 qavatli noqonuniy qurilgan bino sud qarori bilan demontaj qilinadi.
Samarqand shahrining “Konigil” mahallasida joylashgan va “qo‘ziqorin uy” nomi bilan mashhur bo‘lgan 12 qavatli noqonuniy bino buzib tashlanmoqda. Qurilish va uy-joy kommunal xo‘jaligi vazirligining ma’lumotiga ko‘ra, mazkur bino hech qanday loyiha hujjatlari, arxitektura ruxsatnomasi va qurilishga ruxsat beruvchi hujjatlarsiz qurilgan.
Fuqaro F.Xalilov tomonidan qurilgan mehmonxona shaklidagi bino dastlab 9 qavat sifatida rejalashtirilgan bo‘lsa-da, keyinchalik 3 ta qo‘shimcha “chodir”simon qavat qo‘shilib, balandligi 35 metrdan oshgan. Bino qurilishi davomida bir necha bor to‘xtatish bo‘yicha ko‘rsatmalar berilgan bo‘lsa-da, ishlar o‘zboshimchalik bilan davom ettirilgan. Bundan tashqari, birinchi qavatda ruxsatsiz faoliyat yuritgan kafe ham aniqlangan.
2022-yilning 6-iyul kuni Toyloq tumanlararo fuqarolik ishlari bo‘yicha sud F.Xalilovga binoni o‘z hisobidan buzish haqida qaror chiqargan. “O‘zog‘irsanoatloyiha” instituti hamda hududiy inspeksiya xulosasiga ko‘ra, bino seysmik xavfsizlik talablariga javob bermagan, konstruksiyalarda esa darz ketgan joylar mavjudligi aniqlangan.
Vazirlik tomonidan ma’lum qilinishicha, bino qurilishi davomida na muhandislik-geologiya tekshiruvlari, na loyiha-smeta hujjatlari to‘liq ishlab chiqilgan. Loyiha hujjatlari oxirigacha tasdiqlanmagan bo‘lishiga qaramay, “Triumf Proyekt” xususiy ekspertizasi tomonidan asossiz ijobiy xulosa berilgan. Hozirda Respublika komissiyasi xulosasi asosida buzish ishlari boshlangan.
