Ijtimoiy tarmoqlarda ayrim bog'chalardagi bolalarga berilayotgan ovqat sifati keskin tanqidlarga sabab bo'lmoqda

So‘nggi kunlarda ijtimoiy tarmoqlarda ayrim maktabgacha ta’lim tashkilotlarida bolalarga berilayotgan ovqat sifati va mahsulotlarning saqlanish holati bo‘yicha tanqidiy post va videolar tarqalmoqda. Maktabgacha va maktab ta’limi vazirligi ushbu holatlarga izoh berdi.

 

Ma’lumotlarga ko‘ra, birinchi holat Toshkent viloyati Qibray tumanidagi 42-sonli davlat maktabgacha ta’lim tashkilotida bundan 5 oy avval, 2025-yil 27-fevralda sodir bo‘lgan. Hududiy boshqarma tomonidan holat o‘rganilib, ovqatlanish tartibi va sanitariya qoidalariga amal qilinganiga doir xulosa taqdim etilgan.

 

Ikkinchi holatda esa Qoraqalpog‘iston Respublikasi, Chimboy tumanidagi 22-sonli maktabgacha ta’lim tashkilotida oziq-ovqat mahsulotlarining yashirib qo‘yilgani aniqlangan. Bu 2025-yil 23-iyulda Vazirlik audit xizmati tomonidan o‘tkazilgan tekshiruv chog‘ida fosh etilgan. Hozirda zaruriy hujjatlar rasmiylashtirilmoqda va aybdor shaxslarga nisbatan qat’iy choralar ko‘rilishi belgilangan.

 

Vazirlik joriy yilda hukumat tomonidan sog‘lom ovqatlantirish tizimini takomillashtirishga doir qaror qabul qilinganini eslatib o‘tdi. Bu orqali davlat maktabgacha ta’lim muassasalari autsorsing usulida oziqlantirish tizimiga bosqichma-bosqich o‘tkazilmoqda. Maxsus markaz bu jarayonni muvofiqlashtirib, oziq-ovqat xavfsizligi va sanitariya qoidalariga rioya qilinishini nazorat qiladi.