Qoraqalpog‘istonda yuk mashinasi yo‘lovchi poyezdi bilan to‘qnashib ketdi
Yuz bergan to‘qnashuv ortidan poyezdda bo'lgan 150 yo‘lovchi avtobuslarda manzillariga yuborildi.
30-iyul kuni soat 16:09 atrofida Qoraqalpog‘iston Respublikasining Beruniy tumanida joylashgan “Baday” va “Beruniy” temir yo‘l stansiyalari oralig‘idagi 592-kilometrda temir yo‘l transporti bilan bog‘liq noxush holat qayd etildi.
Dastlabki ma’lumotlarga ko‘ra, "KamAZ" rusumli yuk avtomobili haydovchisi yo‘l harakati qoidalarini buzgan holda qo‘riqlanmaydigan temir yo‘l kesishmasidan o‘tmoqchi bo‘lgan va shu paytda harakatlanib kelayotgan yo‘lovchi poyezdi bilan to‘qnashuv sodir bo‘lgan.
Mazkur poyezd Andijon – Qo‘ng‘irot yo‘nalishida harakatlanayotgan bo‘lib, bortda 150 nafarga yaqin yo‘lovchi bo‘lgan. YTH natijasida teplovoz relsdan chiqib ketgan, biroq jabrlanganlar qayd etilmagan.
Favqulodda vaziyat ortidan barcha yo‘lovchilar 6 ta maxsus ajratilgan avtobus orqali Nuqus va Qo‘ng‘irot shaharlari tomon jo‘natildi. Shuningdek, “O‘zbekiston temir yo‘llari” AJ va Ichki ishlar vazirligining tegishli tuzilmalari tomonidan holat yuzasidan surishtiruv ishlari olib borilmoqda.
Poyezd texnik ko‘rikdan so‘ng soat 17:29 da o‘z yo‘nalishi bo‘yicha harakatini tiklab, “Beruniy” stansiyasiga yetib borgan.
