Talabalar soxta hujjatlar bilan o‘qishga qabul qilinyaptimi?
Muhokamalarga sabab bo‘lgan holatga vazirlik izoh berdi.
So‘nggi kunlarda ijtimoiy tarmoqlarda ayrim talabalarning soxta hujjatlar asosida oliy taʼlim tashkilotlariga qabul qilingani haqidagi xabarlar muhokamalarga sabab bo‘ldi. Bunga Oliy taʼlim, fan va innovatsiyalar vazirligi rasmiy munosabat bildirdi.
Taʼkidlanishicha, HEMIS tizimi orqali har bir talabaning qabul qilinishi, o‘qiyotgan yo‘nalishi va kursi aniq qayd etiladi. Xorijdan o‘qishini ko‘chirishda esa faqat rasmiy hujjatlar asosida, o‘quv rejalari solishtirilib, rektor buyrug‘i bilan qabul amalga oshiriladi. Bu jarayon elektron tizimda to‘liq va shaffof yuritiladi, asossiz maʼlumotlar kiritilmaydi.
“Oliy taʼlim, fan va innovatsiyalar vazirligi mazkur masala yuzasidan tekshiruv olib bormoqda. Agar qonunbuzarlik holatlari aniqlansa, belgilangan tartibda huquqiy baho berilib, jamoatchilikka rasmiy axborot taqdim etiladi”, deyiladi xabarda.
