40 ta o‘zlashtirilgan so‘zga o‘zbek tilidagi muqobil atamalar belgilandi
Fanlar akademiyasi, til instituti va mutaxassislar ishtirokida ishlab chiqilgan va omma bilan muhokama qilingan 40 ta o‘zbekcha atama endilikda rasmiy hujjatlarga kiritiladi.
O‘zbekiston Respublikasi Vazirlar Mahkamasi huzuridagi Terminologiya komissiyasi tomonidan davlat tilining ifoda imkoniyatlarini kengaytirish va begona leksik birliklar ta’sirini kamaytirishga qaratilgan navbatdagi til siyosati chora-tadbiri doirasida 40 ta o‘zlashtirilgan so‘zga o‘zbek tilidagi muqobil atamalar belgilandi.
Mazkur qaror til sohasidagi islohotlarning mantiqiy davomidir hamda davlat tilini soflashtirish, uning zamonaviy fan, taʼlim, texnika va ijtimoiy hayotdagi qo‘llanilishini mustahkamlashga qaratilgan.
Ro‘yxatda ilgari nemis, lotin, ingliz, frantsuz, italyan, yunon va rus tillaridan kirib kelgan so‘zlar uchun o‘zbek tilidagi tushunarli va fonetik jihatdan mos atamalar tavsiya etilgan. Xususan:
“Svetofor” so‘zi o‘rniga — yo‘lchiroq,
“Najdak” so‘zi o‘rniga — qumqog‘oz,
“Vokzal” o‘rniga — bekat,
“Magazin” o‘rniga — do‘kon kabi so‘zlar keltirilgan.
Mazkur atamalar tanlovi O‘zbek tili instituti hamda Davlat tilini rivojlantirish boshqarmasi hamkorligida, sohaga oid olimlar, filologlar, amaliyotchilar va jamoatchilik vakillari ishtirokida olib borilgan ochiq muhokamalar asosida ishlab chiqilgan.
O‘zbekiston Fanlar akademiyasi ushbu tashabbusni qo‘llab-quvvatlab, milliy tilimizning funksional salohiyati va xalqaro miqyosda barqaror rivojlanishini ta’minlashda bu kabi chora-tadbirlar muhim rol o‘ynashini qayd etdi.
Yangi ro‘yxat tegishli tashkilotlar va OAVlar orqali jamoatchilikka yetkaziladi.
