Navoiyda havo ifloslanishiga sababchi 3 korxona faoliyati vaqtincha to‘xtatildi

Atrof-muhitni muhofaza qilish borasidagi chora-tadbirlar doirasida Ekologiya, atrof-muhitni muhofaza qilish va iqlim o‘zgarishi vazirligi tomonidan Navoiy shahrida faoliyat yuritayotgan bir nechta sanoat subyektlarining faoliyati vaqtincha to‘xtatildi.

 

Xususan,19-iyul kuni shaharning turli hududlarida havoning keskin ifloslanishi va oq tutun ko‘rinishi bo‘yicha jamoatchilikdan tushgan murojaatlar asosida o‘tkazilgan tekshiruv natijasida quyidagi holatlar aniqlandi:

 

“Zarafshon Industrial Technology” MChJ – korxona tomonidan atrof-muhitga chiqarilayotgan zararli moddalarning miqdori ekologik ekspertiza xulosasida belgilangan me’yordan bir necha barobar yuqori bo‘lgani ma’lum bo‘ldi. Jumladan, vodorod sulfid – 25 baravar, azot oksidi – 12 baravar, ammiak – 7 baravar, oltingugurt dioksidi – 2,6 baravardan ortiq ifloslantiruvchi modda aniqlangan.

 

“Sogda Kimyo Zavodi” MChJ – tegishli davlat ekologik ekspertizasidan o‘tmasdan ishlab chiqarish faoliyatini olib borgan. Bundan tashqari, chiqindilarni tartibsiz saqlash, ochiq hovuzlarda zararli moddalarni yig‘ish, kislotali suvlarni ochiq maydonlarga tashlash holatlari aniqlangan. Korxonaga atrof-muhitga yetkazilgan zarar evaziga 7 milliard 382 million so‘m miqdorida to‘lov belgilandi.

 

“Ferrosplav” MChJ – ham ekologik ekspertizadan o‘tmasdan faoliyat yuritib kelgan. Atmosferaga zararli moddalar chiqarilgani va sanoat chiqindilari tartibsiz to‘plangani aniqlangan.

 

Ekologik qonunchilik talablari buzilgani sababli ushbu uchta korxona faoliyati 10 kunga to‘xtatildi. Agar bu muddat ichida kamchiliklar bartaraf etilmasa va faoliyat ekologik me’yorlarga moslashtirilmasa, sudga murojaat qilinib, korxonalarning faoliyatini to‘liq to‘xtatish choralari ko‘riladi.