Endi o‘quvchi va oʻqituvchilarga ham sanatoriylarga yo‘llanma beriladi
Dam olish muddati pedagog kadrlar uchun sentabr-may oylarida, iqtidorli o‘quvchilar uchun esa iyun-avgust oylarida 12 kun etib belgilanadi.
2025-yil 29-iyul kuni Vazirlar Mahkamasining qarori bilan “Maktabgacha va maktab taʼlimi vazirligi tizimidagi dam olish maskanlariga dam oluvchilarni qabul qilish tartibi to‘g‘risida”gi Nizom tasdiqlandi.
Hujjatga ko‘ra, Maktabgacha va maktab taʼlimi vazirligi tizimida faoliyat yuritayotgan ilg‘or pedagog kadrlar hamda 7–14 yoshdagi iqtidorli o‘quvchilarning vazirlikka qarashli dam olish maskanlariga yuborilishi tartibi belgilandi.
Dam olish muddati pedagog kadrlar uchun sentabr-may oylarida, iqtidorli o‘quvchilar uchun esa iyun-avgust oylarida 12 kun etib belgilanadi. Yo‘llanmalar saralash mezonlari asosida taqdim etilib, yuqori ko‘rsatkichlarga ega bo‘lgan nomzodlarga bepul asosda beriladi.
Ilg‘or pedagoglar qatoriga xalqaro va respublika olimpiada g‘oliblarini tayyorlagan o‘qituvchilar, xalqaro sertifikatlarga ega xorijiy til va STEAM fanlari mutaxassislari, tanlov va musobaqalar sovrindorlari, oliy malakali boshlang‘ich sinf hamda maktabgacha taʼlim pedagoglari kiritiladi.
Iqtidorli o‘quvchilar esa xalqaro va respublika darajasidagi olimpiada, musobaqa va tanlovlarda yuqori natijalarga erishganliklari asosida tanlab olinadi.
Dam olish jarayonida o‘quvchilar uchun sog‘lomlashtirish, sport, maʼnaviy-maʼrifiy, ilmiy-tadqiqot yo‘nalishlarida hamda turizm, texnika, sanʼat va kitobxonlik sohalarida qobiliyatni rivojlantirishga qaratilgan turli tadbirlar tashkil etiladi.
