Toshkentda Lacetti, skuter va Isuzu to‘qnashuvi oqibatida 19 yoshli haydovchi vafot etdi
Holat bo‘yicha dastlabki tergov harakatlari olib borilmoqda.
2-avgust kuni Toshkent shahri Yangi Hayot tumanida sodir bo‘lgan yo‘l-transport hodisasi oqibatida 19 yoshli skuter haydovchisi halok bo‘ldi. Bu haqda Toshkent shahar IIBB Yo‘l harakati xavfsizligi boshqarmasi axborot xizmati xabar bermoqda.
Ma’lumotlarga ko‘ra, soat 19:10 atrofida KXAY ko‘chasining 58-uy qarshisida Lacetti rusumli yengil avtomobil, skuter va Isuzu yuk avtomobili to‘qnashuvi yuz bergan. Hodisa natijasida 2006-yilda tug‘ilgan M.S. ismli skuter haydovchisi olgan tan jarohatlari oqibatida voqea joyida vafot etgan.
Holat yuzasidan Toshkent shahar IIBB tergov boshqarmasi tomonidan Jinoyat kodeksining 266-moddasi 2-qismi (transport vositalari harakati yoki ulardan foydalanish qoidalarini buzish oqibatida odam o‘limiga sabab bo‘lish) bilan jinoyat ishi qo‘zg‘atilib, dastlabki tergov harakatlari olib borilmoqda.
