Umri Amerikada o‘tgan Jo‘raqori Bo‘tako‘z vasiyatiga binoan O‘zbekistonda dafn etildi
Besh tilda erkin so‘zlashgan ijodkor “O‘tkan kunlar” romanini arab alifbosida chop ettirgan.
O'zbekistonning zabardast ijodkori Juraqori Bo‘takо‘z AQShning Virjiniya shtatida 99 yoshida vafot etdi. Uning dafn marosimi ijodkorning o‘z vasiyatiga ko‘ra O‘zbekistonda o‘tkazildi. Bo‘takо‘z Turkiyadagi o‘zbeklar qabristonida yoki AQShdagi musulmonlar qabristonida dafn etilishi mumkin edi, biroq u so‘nggi manzili aynan ona yurti bo'lishini istadi.
1926 yilda Andijon shahrida tug‘ilgan Juraqori Bo‘takо‘z 1930-yillarda oilasi bilan Tojikistonga, keyinchalik Afg‘onistonga ko‘chib ketgan. 1950-yillarda Pokistonda yashagan davrida urdu tilini o‘rganish uchun har kuni gazeta mutolaa qilgan. Besh tilda erkin so‘zlashgan ijodkor “Bo‘takо‘znoma”, “Ona tilimni deb”, “Bulujuston esdaliklari” kabi asarlari bilan tanilgan. “Bo‘takо‘znoma”da u bolalik chog‘ida Vatanini tark etishga majbur bo‘lgani va boshidan kechirgan sinovlarini yozgan.
Bo‘takо‘zning Abdulla Qodiriy ijodiga bo‘lgan hurmati alohida ta’kidlanadi. 1960-yillarda xorijdagi o‘zbeklar uchun “O‘tkan kunlar” romanini arab alifbosida Karachida chop ettirishi katta jasorat sifatida baholanadi. Jurnalist va siyosiy sharhlovchi Sharofiddin To'laganovga ko'ra, marhum Juraqori Bo‘takо‘z so‘nggi yo‘lga Sherqon Qodiriyning uyidan kuzatildi. Ijodkor “Kamolon” qabristonida, Abdulla Qodiriyning ramziy qabri yoniga qo‘yildi.
