Sog‘liqni saqlash vazirligi fuqarolarni soxta tabiblardan ogoh bo‘lishga chaqirdi
2024-yilda litsenziyasiz tibbiy faoliyat bilan shug‘ullangan 38 nafar shaxs jarimaga tortilgan.
Vazirlik matbuot xizmatining bildirishicha, so‘nggi yillarda davlat tomonidan xalq tabobatini rivojlantirish, uni zamonaviy sog‘liqni saqlash tizimiga izchil integratsiyalash va mutaxassislar malakasini oshirishga katta e’tibor qaratilmoqda. Natijada mamlakatda 150 ta tadbirkorlik subyekti tegishli litsenziya asosida xalq tabobati yo‘nalishida faoliyat yuritmoqda.
Biroq, so‘nggi paytlarda litsenziyasiz, ruxsat etilmagan usullar yordamida kasalliklarga tashxis qo‘yib, ularni davolashga urinayotgan va shu orqali insonlar sog‘ligi hamda hayotiga jiddiy xavf tug‘dirayotgan soxta tabiblar soni ortib bormoqda.
“Eng yomoni, xastaliklardan tez, oson va asoratsiz qutulishni istagan yurtdoshlarimiz o‘zini “g‘ayritabiiy qobiliyatlarga ega” deb tanishtirgan, hech qanday tibbiy tasdiqlanmagan hamda sinovlardan o‘tmagan muolajalarni taklif qilayotgan shaxslarga ishonib qolmoqda. Ayniqsa, ijtimoiy tarmoqlar bunday shubhali xizmatlar uchun asosiy targ‘ibot maydoniga aylanmoqda”, — deyiladi vazirlik bayonotida.
SSV bunday usullar dalillarga asoslangan tibbiyot davolash protokollariga mutlaqo mos kelmasligini, ularni qo‘llayotgan shaxslarga hech qanday rasmiy litsenziya berilmaganini ta’kidladi.
“Shunday ekan, ijtimoiy tarmoqlardagi soxta tabiblardan ogoh bo‘ling! O‘zingiz, oila a’zolaringiz va yaqinlaringiz salomatligini xavf ostiga qo‘ymang!”, — deya ogohlantirdi vazirlik.
Ma’lum qilinishicha, 2024-yilda litsenziyasiz tibbiy faoliyat bilan shug‘ullangan 38 ta yuridik shaxsning har biri bazaviy hisoblash miqdorining 300 baravari miqdorida jarimaga tortilgan. 2025-yil 1-iyul holatiga esa bunday qonunbuzarlik sodir etgan 24 ta yuridik shaxsga moliyaviy jarima qo‘llangan.
