Toshkentda avtobus haydovchisi bolani eshik bilan urib yuborgani uchun ishdan bo‘shatildi
“Toshshahartransxizmat” tekshiruviga ko‘ra, haydovchi ichki qoidalarni buzgan.
Toshkent shahrida avtobus haydovchisi yo‘lovchi bolani eshik bilan urib yuborgani va uning ota-onasi bilan janjallashgani aniqlangach, “Toshshahartransxizmat” AJ tomonidan ichki tekshiruv o‘tkazildi. Tekshiruv yakuniga ko‘ra, haydovchi bilan tuzilgan mehnat shartnomasi bekor qilindi.
Haydovchining so‘zlariga ko‘ra, u bekatda to‘xtaganida yo‘lovchi chiqib ketayotgan paytda eshikni yopib yuborgan. “Qilgan ishimdan afsusdaman. Bunday holat takrorlanmaydi. Yo‘lovchilardan uzr so‘rayman”, — dedi u.
Kompaniyaning ta’kidlashicha, qoidalarga binoan, haydovchi oxirgi yo‘lovchi avtobusdan to‘liq tushmaguncha transport vositasi bekatda qolishi shart.
Yo‘lovchiga qo‘pol munosabatda bo‘lgani va korxona ichki tartib-qoidalarini buzgani uchun haydovchi ishdan bo‘shatildi. Shuningdek, bunday holatlarning oldini olish maqsadida boshqa haydovchilar uchun qo‘shimcha treninglar o‘tkazilishi rejalashtirilgan.
