“Arda Xiva” zamonaviy sayyohlik markaziga aylanmoqda
Majmua o‘zida Xorazmning eng yaxshi anʼanalari va zamonaviy qiyofasini birlashtirgan.
Ayni paytda Xorazm viloyatining qadimiy Xiva shahrida joylashgan “Arda Xiva” majmuasi hamda “Ichan qalʼa” davlat muzeyqo‘riqxonasi hududida “Qovun sayli – 2025” festivali bo‘lib o‘tmoqda.
Festivalning bosh maydoni bo‘lmish “Arda Xiva” zamonaviy turizm majmuasi 24,5 gektar maydonda joylashgan bo‘lib, o‘zida keng qamrovli infratuzilmani jamlagan. Majmua tarkibiga 18 ta mehmonxona, 24 ta restoran va kafe, hunarmandchilik uylari, sharq bozori, akvaparklar, 3000 tomoshabinga mo‘ljallangan amfiteatr, sayr qilish uchun qulay sohil bo‘yi, musiqali favvora hamda boshqa zamonaviy dam olish maskanlari kiradi.
“Qovun sayli – 2025” nafaqat Xorazmning qovunchilikdagi boy salohiyatini, balki uning madaniy merosi, milliy taomlari va mehmondo‘stligini dunyoga tanitadigan yirik festivalga aylanmoqda. Arda Xiva esa bu jarayonning yuragi sifatida Xorazmning eng yaxshi anʼanalari va zamonaviy qiyofasini birlashtirmoqda.
