Olmaotada qolgan ona va uning ikki nafar farzandi O‘zbekistonga olib kelindi
Hozirda diplomatlar ko‘magi bilan ularga psixologik va moddiy yordam ko‘rsatilmoqda.
Qozog‘istonning Olmaota shahrida mushkul ahvolda qolgan vatandoshimiz G.R. va uning ikki nafar voyaga yetmagan farzandlari O‘zbekiston diplomatlari ko‘magida mamlakatimizga olib kelindi. Bu haqda “Dunyo” axborot agentligi xabar berdi.
Ushbu insonparvarlik yordami O‘zbekistonda 30-iyuldan 30-avgustgacha davom etayotgan “Vatanga qaytarish” xayriya aksiyasi doirasida amalga oshirildi.
Diplomatlar ona va farzandlarining Olmaota–Toshkent yo‘nalishidagi aviaqatnov bilan mamlakatga qaytishini ta’minladi. Ularni Toshkent xalqaro aeroportida Toshkent viloyati hokimligi hamda Oila va xotin-qizlar qo‘mitasi viloyat bo‘limi vakillari kutib oldi.
Hozirda ularga psixologik, moddiy va boshqa zarur yordamlar ko‘rsatilmoqda.
