OTM kontrakt to‘loviga yosh cheklovisiz soliq imtiyozi beriladi
Endi ota-onalar farzandi uchun kontrakt to‘laganda 12 foizlik daromad solig‘i to‘lamaydi.
Oliy va professional ta’lim muassasalarida o‘qish uchun to‘lanadigan kontrakt mablag‘lariga oid soliq imtiyozlari tartibiga o‘zgartirish kiritildi. Soliq qo‘mitasining yangi qaroriga ko‘ra, endi fuqaro o‘zining, farzandining yoki turmush o‘rtog‘ining ta’limi uchun to‘lagan mablag‘dan 12 foizlik daromad solig‘i undirilmaydi.
Avval amaldagi tartibga ko‘ra, bunday imtiyoz faqat talaba 26 yoshga to‘lmagan taqdirda qo‘llanilardi. Yangi qoidaga muvofiq esa imtiyoz yoshdan qat’i nazar amal qiladi. Bu esa ota-onalarga voyaga yetgan farzandining o‘qishi uchun ham soliq yengilliklaridan foydalanish imkonini beradi.
Soliq imtiyozi nafaqat talabaning o‘zi to‘lov qilganida, balki ota-onasi yoki turmush o‘rtog‘i kontrakt pulini to‘laganida ham amal qiladi. Muhimi, ta’lim professional yoki oliy bo‘lishi lozim.
Mutasaddilar mazkur o‘zgarish ta’lim olish imkoniyatlarini kengaytirishi va oilalarning moliyaviy yukini kamaytirishiga ishonch bildirmoqda.
