Nursulton Ro‘ziboyevning Amerikadagi jangi bekor qilindi
Bunga raqib belgilangan vazn meʼyorlarini bajara olmagani sabab bo‘lgan.
Ertaga, 17-avgust kuni AQSHning Chikago shahrida o‘tkazilishi rejalashtirilgan UFC turnirida oktagonga chiqishi kerak bo‘lgan o‘zbekistonlik jangchi Nursulton Ro‘ziboyev va amerikalik Brayan Battl o‘rtasidagi bahs bekor qilindi.
Bunga Brayan Battl belgilangan vazn meʼyorlarini bajara olmagani sabab bo‘lgan. Gap shundaki, AQSH vakili 86,1 kg tosh bosgan. Bu belgilangan miqdordan salkam 2 kg ko‘proq. Shu bois UFS mazkur jangni bekor qilishga qaror qilgan.
Shundan keyin sportchilar ucharashib, o‘zaro suhbatlashib olishgan. Brayan Nursulton bilan suhbatda jangdan oldin o‘tkazilgan matbuot anjumanida o‘zbekistonlik muxlislar haqida aytgan gaplari uchun ham uzr so‘ragan. Ro‘ziboyev esa unga oktyabr oyida Abu-Dabida o‘tadigan UFC oqshomiga jang qilishni taklif qilgan.
Eslatib o‘tamiz, avvalroq Bryan Battle ijtimoiy tarmoqlarda o‘zini haqorat qilgan ayrim o‘zbek foydalanuvchilariga javoban “barcha o‘zbek UFC muxlislari ahmoq” deya fikr bildirgandi.
Jang bekor qilingach Nursulton Ro‘ziboyev ham Instagam sahifasi orqali unga javob post yozib qoldirdi.
“Ko‘p gapirmasdan, avvalo vaznni to‘g‘rilashing kerak. Bu — professional sport, malla soch”, degan Ro‘ziboyev.
