Andijonda ayol erkakning shaxsiy suratlarini tarqatish bilan qo‘rqitib, 300 dollar talab qildi
Sobiq tanishidan shantaj yo‘li bilan pul talab qilgan 34 yoshli ayol jinoyat ustida qo‘lga olindi.
Andijon viloyatida shaxsiy hayot daxlsizligiga oid tovlamachilik holati aniqlanib, jinoyatga aloqador shaxs qo‘lga olindi. Bu haqda Andijon viloyati IIB xabar berdi.
Huquqni muhofaza qiluvchi organlarga murojaat qilgan fuqaro eski tanishi unga shaxsiy suratlarini tarqatish bilan tahdid qilib, pul talab qilganini ma’lum qilgan.
O‘tkazilgan tezkor tadbirlar davomida Shahrixon tumanida yashovchi 34 yoshli ayol sobiq tanishidan 300 AQSh dollari talab qilgani va ushbu mablag‘ni olayotgan vaqtida jinoyat ustida qo‘lga olingani aniqlandi.
Mazkur holat yuzasidan O‘zbekiston Respublikasi Jinoyat kodeksining 165-moddasi (“Tovlamachilik”) bo‘yicha jinoyat ishi qo‘zg‘atilgan.
Hozirda tergov harakatlari olib borilmoqda. Amaldagi qonunchilikka muvofiq, bunday qilmish uchun uch yildan besh yilgacha ozodlikni cheklash yoki ozodlikdan mahrum qilish jazosi nazarda tutilgan.
