Vazirlik “Open budjet” ovoz berish jarayonida firibgarlikdan ogohlantirdi
Endi firibgarlar “Open budjet” orqali fuqarolarni aldamoqda.
Iqtisodiyot va moliya vazirligi so‘nggi kunlarda ijtimoiy tarmoqlarda “Tashabbusli budjet” loyihalarida ovoz berish evaziga pul mukofoti taklif etayotgan norasmiy Telegram-botlar faol bo‘lib borayotgani haqida ogohlantirdi. Vazirlik ma’lumotiga ko‘ra, bunday takliflarga aldanayotgan fuqarolar soni ortib bormoqda.
“Vazirlikka yuzlab murojaatlar kelib tushmoqda. Fuqarolar uchinchi shaxslar tomonidan turli loyihalarga ovoz yig‘ish maqsadida pul va’dalariga ishongan, biroq keyinchalik va’da qilingan mablag‘larni ololmagan,” – deyiladi rasmiy bayonotda.
Rasmiy ma’lumotlarga ko‘ra, “Tashabbusli budjet” jarayonlarida ovoz berish faqat Ochiq budjet portali openbudget.uz, Telegram’dagi rasmiy bot, shuningdek, Android va iOS tizimidagi rasmiy ilovalar orqali amalga oshiriladi.
Vazirlik yana bir bor ta’kidladi: “Tashabbusli budjet” platformalarida berilgan ovozlar uchun na to‘lov talab qilinadi, na moddiy mukofotlar nazarda tutiladi. Fuqarolardan shubhali manbalarga ishonmaslik va firibgarlikka uchramaslik so‘ralmoqda.
