“Men adolat so‘rayapman” — Guliraʼno Qosimova Saida Mirziyoyevadan yordam so‘ramoqda
Furqat tumanidagi maktab direktori IIB va Soliq boshliqlari munosabati qurboni bo‘lgan edi. Ishi yopiq sudda bosim bilan ko‘rilayotgan ayol yig‘lab murojaat bilan chiqdi.
Farg‘ona viloyati Furqat tumanidagi 29-sonli umumtaʼlim maktabi direktori Guliraʼno Qosimova sud ishida jabrlanuvchi sifatida ishtirok etayotgani va bu jarayonda o‘zini adolatsiz munosabat qurboni sifatida his qilayotganini jamoatchilikka maʼlum qildi.
Qosimovaning taʼkidlashicha, u ishda jabrlanuvchi sifatida qatnashsa-da, sudda unga ayblovchi sifatida munosabat qilyapti, hatto sud zalidan chiqarib yuborilganini ham so‘zlab berdi. Shu sababli u ichki ishlar xodimlari va yuqori lavozimli mansabdor shaxslarga murojaat qilib, ishni ochiq va adolatli sud muhokamasi orqali ko‘rib chiqishni talab qilmoqda.
Guliraʼno Qosimovaning taʼkidlashicha, sud jarayonida unga nisbatan haqoratli munosabat kuzatilgan.
“Sudda meni haqorat qilishgacha o‘tyapti. Men bu holatdan norozi bo‘lib raddiya berdim, ammo sud buni qabul qilmadi”, — deydi u.
Sudda advokatlarning telefonlari ham yig‘ib olinayotgani haqida aytadi.
“Sud yopiq bo‘lsa, OAV xodimlari kirmasa, advokatlarning telefoni olib qo‘yilsa, eʼtiroz bildirish huquqimiz cheklansa — unda sudning yopiq o‘tishidagi maqsad nima?” — deya so‘raydi u.
Qosimova, shuningdek, sud majlisida unga bosim o‘tkazilayotganini ham taʼkidladi:
“Guvoh sifatida bergan ko‘rsatmalarimda sudya gapimni bo‘lib, ‘eslay olmaysizmi, eslolmayotgan ekansiz‘, deb menga yo‘naltirishlar bermoqda. Bu holat adolatli jarayonga xalaqit berayapti”, — deydi o‘z shaʼni va qadr-qimmati uchun kurashayotgan ayol.
“Men kurashyapman — faqat o‘zim uchun emas, barcha ayollar uchun. Mendan keyin hech bir ayol shunday tahqirga uchramasin”, — dedi direktor.
Guliraʼno Qosimova aybdorlar javobgarlikka tortilishidan oldin bu yo‘ldan chekinmasligini, haqiqat va adolat tiklanguniga qadar kurashni davom ettirishini bildirdi.
“Sud ochiq bo‘lmasa, adolat ham yo‘q”
Qosimova sud jarayonidagi adolatsizlik va bosim holatlariga rasman eʼtiroz bildirib, ishni Oliy sudda ommaviy axborot vositalari ishtirokida ko‘rib chiqishni so‘ramoqda.
"Ishni Oliy sudda ko‘rishsin, ochiq muhokama bo‘lsin. Sud ochiq bo‘lmasa — adolat ham bo‘lmaydi”, — dedi u.
Direktorning fikricha, ochiq sud jarayoni orqali jamoatchilik haqiqatni o‘z ko‘zi bilan ko‘rishi va har bir ishtirokchining haqiqiy harakatini bilishi mumkin bo‘ladi.
Guliraʼno Qosimova sud jarayonidagi bosim, dalillar inobatga olinmayotgani va tergov jarayonidagi kamchiliklar sababli Prezident Administratsiyasi rahbari Saida Mirziyoyeva hamda Oliy Majlis Senati raisi Tanzila Norboyevaga murojaat qildi.
“Iltimos, Saida Shavkatovna, mana shu videomurojaatni ko‘rsangiz, yordam bering. Men adolat so‘rayapman”, — dedi u.
Shuningdek, direktor boshqa masʼul rahbarlar va jamoatchilik vakillariga ham o‘z dalil va hujjatlarini taqdim etishga tayyorligini bildirdi.
“Rahbarim prinsipial inson, adolatni qadrlaydi”
Guliraʼno Qosimova Farg‘ona viloyati maktab taʼlimi boshqarmasi boshlig‘i Sherzod Dolimov tomonidan ko‘rsatilgan huquqiy va maʼnaviy qo‘llab-quvvatlovni alohida taʼkidladi:
“Mening rahbarim prinsipial inson. U birinchi navbatda aniqlik va adolatni qadrlaydi”, — deydi maktab direktori.
Guliraʼno Qosimovaning ishi mamlakat sud-huquq tizimida shaffoflik va adolatni taʼminlash yo‘lidagi muhim sinov sifatida baholanmoqda. Uning murojaatlari va jamoatchilikka qilgan chiqishlari jabrlanuvchilar huquqini himoya qilish, sud jarayonlarida ochiqlik va javobgarlikni taʼminlash borasida dolzarb masalalarni ko‘tarmoqda.
Farg‘ona sud zalida kechayotgan bu jarayon — haqiqat bilan jasorat, vijdon bilan mansab to‘qnashgan maydon. Guliraʼno Qosimova bu maydonda yolg‘iz bo‘lishi mumkin, ammo ortida xalqning ko‘zi, odamlarning adolatga bo‘lgan umid turibdi.
Bu sudning natijasi nafaqat bir inson taqdirini, balki butun tizimga bo‘lgan ishonchni belgilaydi.
Moʻtabar Nurmuhammedova
