Bir o‘rindiq sababli mojaro: Toshkentda ikki erkak 3 sutkaga qamaldi
Metroda joy bermagani uchun yo‘lovchini haqorat qilgan va keyinchalik uning ortidan borgan erkaklarga jazo tayinlandi.
Toshkentda metroda bir yigitni haqorat qilib, keyinchalik ta’qib qilgan ikki erkakka nisbatan ma’muriy qamoq jazosi tayinlandi. Bu haqda Toshkent shahar Ichki ishlar bosh boshqarmasi matbuot xizmati xabar berdi.
Ma’lum qilinishicha, Chilonzor yo‘nalishidagi metroda yo‘lovchilar o‘rtasida nizo kelib chiqqan. Fuqaro A. boshqa yo‘lovchi unga o‘rnini bo‘shatib bermaganidan norozi bo‘lib, uni turli uyatli so‘zlar bilan haqorat qilgan va og‘zaki janjallashgan.
Biroq mojaro shu bilan tugamagan. A. yigitning ortidan borib, Chilonzor tumanidagi ovqatlanish shoxobchasi yaqinida ham uni haqorat qilishda davom etgan. IIBB ma’lumotiga ko‘ra, u jamoat joyida jamiyatda yurish-turish qoidalarini qasddan mensimagan.
Voqea aks etgan video ijtimoiy tarmoqlarda tarqalib, muhokamalarga sabab bo‘lgan. Keyinchalik jabrlanuvchi videoni uning ruxsatisiz Instagram sahifasiga joylashtirishganini aytgan.
Huquqbuzarlardan biri videoni kontent va layklar uchun joylashtirganini bildirgan. U sodir bo‘lgan voqeadan afsusda ekanini aytib, jabrlanuvchidan va boshqalardan uzr so‘ragan. Ikkinchi erkak ham pushaymonligini bildirgan.
Chilonzor tumani jinoyat ishlari bo‘yicha sudi huquqbuzarlarni Ma’muriy javobgarlik to‘g‘risidagi kodeksning 183-moddasi (mayda bezorilik) bilan aybdor deb topib, har biriga uch sutkadan ma’muriy qamoq jazosi tayinlagan.
