Toshkentda havo sifati: 15-noyabr tongida yaxshilanishi mumkin
Hozirda atmosfera havosi sifati Maxsus komissiya tomonidan doimiy monitoring qilinmoqda.
15-noyabrga o‘tar kechasi Toshkent shahrida havo sifati o‘zgarishi mumkin. Prognozlarga ko‘ra, kechki soatlarda havo sifati Xalqaro havo sifati indeksi (AQI) bo‘yicha dastlab “o‘rtacha”, soat 21:00 dan tonggacha “sezgir guruhlar uchun nosog‘lom” darajada bo‘lishi kutilmoqda. Milliy havo sifati indeksi bo‘yicha shahar o‘rtacha ko‘rsatkichi asosan “yashil”, ayrim muddatlarda “sariq” darajada bo‘lishi mumkin.
Qayd etilishicha, tunda havo haroratining pasayishi, juda kuchsiz shamol va kuchli harorat inversiyasi atmosferaning quyi qatlamlarida havo almashinuvini cheklaydi. Ushbu sharoit mahalliy va qo‘shni hududlarda shakllangan tashlamalar va PM zarrachalarining tarqalishini susaytirib, yer yuzasiga yaqin qatlamda saqlanib qolishiga sharoit yaratadi.
Prognozlarga ko‘ra, 15-noyabr tonggi muddatlarda inversiyaning kuchsizlanishi havo sifatini yaxshilaydi. Soat 10:00 ga kelib havo sifati Xalqaro AQI bo‘yicha “o‘rtacha”, milliy indeks bo‘yicha “yashil” darajaga tushishi mumkin.
