Falastinning BMTdagi vakili: Tinchlik shartnomasidan beri Isroil har kuni G‘azoda 2 nafar bolani o‘ldirmoqda
Falastinning BMTdagi doimiy vakili Riyad Mansur BMT Xavfsizlik Kengashida Yaqin Sharqdagi vaziyat, jumladan Falastin masalasi bo‘yicha sessiyada nutq so‘zladi.
"G‘azoda tinchlik kuchga kirganidan (10-oktyabr) beri har kuni 1000 kishi halok bo‘lishi yoki jarohatlanishi, har kuni 2 nafar bolaning halok bo‘lishi, genotsiddan omon qolganlar har kuni o‘lim va azobdan qochishi, va ko‘chirilgan oilalar qishni suv bosgan chodirlarda o‘tkazishini hech narsa oqlay olmaydi", — degan u o‘z nutqida.
Mansurning ta’kidlashicha, Isroil falastinliklarning “yashash, ozodlik va tinchlikka erishish” yo‘lidagi harakatini ataylab to‘sishga urinmoqda. U AQSh ma’muriyatini o‘t ochishni to‘xtatish rejimining buzilishining oldini olish uchun aralashuvga chaqirdi, kafillik qilayotgan davlatlar esa keyingi bosqichga e’tibor qaratish o‘rniga ketma-ket yuz berayotgan inqirozlarni bartaraf etishga majbur bo‘layotganini aytdi.
Mansurga ko‘ra, falastinliklar Isroilning “majburiy ko‘chirish, bosqin siyosatini davom ettirish va o‘t ochishni to‘xtatishni buzish ustida ishlash” niyatini bilishiga qaramay, AQSh Prezidenti Donald Trampning tinchlik rejasini qabul qilgan. Biroq Isroil yordam kirishini kechiktirish, hujumlarni qayta boshlash va Sariq Chiziq orqali G‘azodagi bosqinni chuqurlashtirish orqali o‘t ochishni to‘xtatish rejimini buzish maqsadini amalga oshirishga urinayotganini aytdi.
Mansur, shuningdek, Isroil askarlari va falastinliklarning yerini tortib olgan ko‘chmanchi yahudiylarning G‘arbiy Sohil va Quddusdagi hujumlariga, majburiy ko‘chirishga, mahalliy aholining yerlaridan haydalishiga va hududlarning egallanilishiga darhol barham berilishi kerakligini ta’kidladi.
U Isroil qamoqxonalardagi falastinlik mahbuslar masalasiga ham to‘xtalib, BMT Xavfsizlik Kengashining turli xil qiynoqlarga duchor bo‘lgan minglab tutqunlarning ahvoliga e’tibor qaratmayotganini “hech qanday asosga ega emas”, deya tanqid qildi.
Mansurning so‘zlariga ko‘ra, Sde Teiman qamoqxonasida isroillik qo‘riqchilarning falastinlik mahkumga zo‘ravonlik qilganini tasdiqlovchi video tarqalganida, Isroilda “jinoyatning o‘zi emas, videoning tarqalishi” janjalga aylangan, hatto ba’zilar qo‘riqchilarni “qahramon” sifatida ko‘rgan.
