Toshkentda 31 yoshli erkakning burun operatsiyasi vaqtida vafot etishi ortidan klinika faoliyati to‘xtatildi
Bosh prokuraturaning zamon.uz'ga ma'lum qilishicha, holat yuzasidan jinoyat ishi ochilgan.
Joriy yilning 12-noyabr kuni Olmazor tumanida joylashgan “Ibotov” xususiy tibbiyot muassasasida 31 yoshli erkak o‘tkazilgan burun operatsiyasi chog‘ida vafot etdi. Holat yuzasidan tegishli tartibda jinoyat ishi qo‘zg‘atildi. Bu haqda zamon.uz'ga Bosh prokuratura matbuot xizmati xabar berdi.
Qayd etilishicha, 29-noyabr kuni mazkur klinika shifokorlariga nisbatan Jinoyat kodeksining 116-moddasi (kasb yuzasidan o‘z vazifalarini lozim darajada bajarmaslik) bilan jinoyat ishi ochilgan.
Shuningdek, Olmazor tumani sanitariya-epidemiologik osoyishtalik va jamoat salomatligi xizmati bo‘limining tegishli qaroriga muvofiq, xususiy klinika faoliyati vaqtincha to‘xtatildi.
“Tergov harakatlari har tomonlama, to‘liq va xolisona o‘tkazilishi va natijasi bo‘yicha qonuniy qaror qabul qilinishi ta’minlanadi”, — deyiladi rasmiy axborotda.
Zamon.uz hodisaga yanada oydinlik kiritish maqsadida marhumning yaqinlari bilan uchrashdi va klinikada bo'ldi. Tez orada Zamon.uz'ning YouTube sahifasida hodisa bo'yicha batafsil reportaj e'lon qilinadi.
