Qozog‘istonda tibbiyot xodimlariga hujum qilganlar 12 yilgacha qamaladi
Mazkur qonun bir qator shov-shuvli voqealardan so‘ng qabul qilindi.
Qozog‘iston Respublikasi parlamenti Majlisi (quyi palata) tibbiyot xodimlari ва tez yordam haydovchilariga nisbatan zo‘ravonlik uchun jinoiy javobgarlikni kuchaytirishni nazarda tutuvchi qonunni qabul qildi. Mazkur qaror chorshanba kuni bo‘lib o‘tgan yalpi majlisda maʼqullandi deb yozadi TASS.
Qabul qilingan qonunga muvofiq, Jinoyat kodeksiga yangi modda kiritilib, tibbiyot xodimlariga nisbatan zo‘ravonlik alohida jinoyat tarkibi sifatida belgilandi. Og‘irlashtiruvchi holatlarda sodir etilgan zo‘ravonlik uchun 7 yildan 12 yilgacha, og‘irlashtiruvchi holatlarsiz holatlarda esa 5 yildan 10 yilgacha ozodlikdan mahrum qilish jazosi nazarda tutilmoqda.
Shuningdek, tibbiyot xodimlarining hayoti ва sog‘lig‘iga bevosita xavf tug‘dirmaydigan zo‘ravonlik harakatlari uchun 7 600 AQSH dollarigacha jarima, 600 soatgacha majburiy jamoat ishlari yoki 3 yilgacha ozodlikni cheklash jazosi qo‘llanilishi belgilandi. Tibbiyot xodimlariga nisbatan zo‘ravonlik bilan tahdid qilish ham jinoyat sifatida baholanib, buning uchun 3 yilgacha ozodlikdan mahrum qilish jazosi ko‘zda tutilgan.
Mazkur qonun bir qator shov-shuvli voqealardan so‘ng qabul qilindi. Jumladan, Qostanay viloyatidagi shifoxonada jarrohga qilingan hujum oqibatida u og‘ir ahvolda reanimatsiyaga yotqizilgan edi. Ushbu holatdan keyin Qozog‘iston Prezidenti Qosim-Jomart Toqayev tibbiyot xodimlariga qarshi jinoyatlar uchun jazolarni kuchaytirish bo‘yicha topshiriq bergan.
Shuningdek, sog‘liqni saqlash vaziri Akmaral Alnazarova joriy yil iyul oyida fuqarolarni tibbiyot xodimlariga nisbatan zo‘ravonlikni to‘xtatishga chaqirib, tibbiyot muassasalarida xavfsizlik choralari kuchaytirilganini maʼlum qilgan edi.
