AQSh Suriyadan barcha qo‘shinlarini olib chiqishini ma’lum qildi

 

 

AQSh Suriyadagi harbiy qo'shinini to‘liq olib chiqish to‘g‘risida qaror qabul qildi va shu orqali mamlakat hududida qariyb o‘n yil davom etgan missiyasiga yakun yasamoqda. Bu haqda The Wall Street Journal manbalarga tayanib xabar berdi.

 

Nashr ma’lumotlariga ko‘ra, Qo‘shma Shtatlar Suriyada joylashgan taxminan ming nafar harbiy xizmatchisini bosqichma-bosqich olib chiqishni rejalashtirgan. Ta’kidlanishicha, ushbu qaror AQSh va Eron o‘rtasidagi keskinlik bilan bevosita bog‘liq emas.

 

Amerikalik rasmiylar bayonotiga ko‘ra, Oq uy hozirgi sharoitda AQShning Suriyadagi harbiy ishtirokini zarur deb hisoblamayapti. Qaror, shuningdek, asosan kurd kuchlaridan iborat va AQSh tomonidan qo‘llab-quvvatlangan Suriya Demokratik Kuchlari (SDK)ni hukumat armiyasi tarkibiga bosqichma-bosqich qo‘shish jarayonlari bilan ham izohlanmoqda.

 

Bundan tashqari, qo‘shinlarni olib chiqishning yana bir sababi sifatida Suriya hukumat kuchlari bilan ehtimoliy to‘qnashuv xavfini kamaytirish zarurati ko‘rsatilgan. AQSh ma’muriyatidagi yuqori lavozimli manbalarga ko‘ra, Damashq rasmiylari aksilterror operatsiyalarida yetakchi rolni o‘z zimmasiga olayotgani fonida harbiy missiyaning dolzarbligi qayta ko‘rib chiqilgan.

 

Ma’lum qilinishicha, Suriyadagi Amerika harbiy kontingentining asosiy vazifasi IShID tahdidiga qarshi kurashdan iborat bo‘lgan. AQSh kuchlarining katta qismi mamlakatning shimoli-sharqida SDK bilan hamkorlikda, yana bir qismi esa Al-Tanf harbiy bazasi hududida joylashtirilgan edi.

 

Xabarlarga ko‘ra, AQSh harbiy ishtirokining qisqarishi ayrim xalqaro va amerikalik rasmiylarda xavotir uyg‘otgan. Ularning fikricha, bu holat Damashq va SDK o‘rtasidagi kelishuvlarning zaiflashishiga hamda terrorchilik tahdidlarining qayta faollashishiga zamin yaratishi mumkin.