O‘zbekiston sportchilari qishki Olimpiya o‘yinlaridagi ishtirokini medalsiz yakunladi
Mamlakat sharafini short-trekchi Daniil Yeybog va tog‘ chang‘ichisi Medet Nazarov himoya qildi.
O‘zbekiston sportchilari qishki Olimpiya o‘yinlaridagi ishtirokini medalsiz yakunladi. Mamlakat sharafini short-trek bo‘yicha Daniil Yeybog hamda tog‘ chang‘isi yo‘nalishida Medet Nazarov himoya qildi.
Short-trek bahslarida Daniil Yeybog 1500 metr masofada chorak final bosqichidan muvaffaqiyatli o‘tib, o‘z guruhida 2:16.963 natija bilan uchinchi bo‘lib yarim final yo‘llanmasini qo‘lga kiritdi. Keyinchalik “B” finalida qatnashgan sportchi beshinchi bo‘lib marraga yetib keldi va umumiy hisobda ushbu masofani 14-o‘rinda yakunladi.
Shuningdek, u 500 metr masofadagi saralash bosqichidan ham muvaffaqiyatli o‘tdi. Chorak final bahslarida marraga beshinchi bo‘lib yetib kelgan Yeybog yarim final yo‘llanmasini qo‘lga kirita olmadi va short-trek yo‘nalishidagi ishtirokini yakunladi.
Tog‘ chang‘isi bo‘yicha Medet Nazarov gigant-slalom dasturida ikki urinishni amalga oshirdi. Birinchi startda 1:25.75, ikkinchi urinishda esa 1:21.14 natija qayd etib, jami 2:46.89 ko‘rsatkich bilan musobaqani 50-pog‘onada yakunladi.
Slalom dasturida esa sportchi birinchi startda 1:07.51 natija ko‘rsatdi. Biroq ikkinchi startni yakunlay olmadi va ushbu yo‘nalishdagi bahslarni muddatidan avval tugatdi. Shu tariqa, tog‘ chang‘ichining Olimpiadadagi ishtiroki ham nihoyasiga yetdi.
