Xitoyda pirotexnika do‘konidagi portlash oqibatida 12 kishi halok bo‘ldi
So‘nggi haftalarda Xitoyda sanoat va pirotexnika bilan bog‘liq bir necha portlash holatlari qayd etilmoqda.
Xitoyning Xubey provinsiyasining Syangyang shahrida joylashgan pirotexnika mahsulotlari do‘konida yuz bergan portlash oqibatida kamida 12 kishi halok bo‘ldi. Bu haqda TRT ma’lum qildi.
Dastlabki ma’lumotlarga ko‘ra, hodisa Oy taqvimi bo‘yicha Yangi yil bayramining ikkinchi kuni, taxminan mahalliy vaqt bilan soat 14:00 atrofida sodir bo‘lgan. Yong‘in va portlash natijasida qariyb 50 kvadrat metr maydon zarar ko‘rgan.
Mahalliy hokimiyat vakillari portlash sabablarini aniqlash yuzasidan tergov ishlarini boshlagan. Rasmiylarga ko‘ra, bayram kunlari mushakbozlik va petardalardan keng foydalanilishi xavfsizlik xatarlarini oshiradi.
Ta’kidlanishicha, ushbu fojea so‘nggi kunlarda mamlakatda sodir bo‘layotgan sanoat va pirotexnika bilan bog‘liq navbatdagi yirik hodisalardan biri hisoblanadi. Avvalroq Szyansu provinsiyasida pirotexnika do‘konida yuz bergan portlash oqibatida 8 kishi halok bo‘lgan, bir necha kishi jarohat olgan edi.
Shu munosabat bilan Xitoy Favqulodda vaziyatlar vazirligi butun mamlakat bo‘ylab pirotexnika ishlab chiqarish va savdo obyektlarida xavfsizlik nazoratini kuchaytirishga chaqirdi. Fuqarolarga esa portlovchi buyumlar bilan ishlashda xavfsizlik qoidalariga qat’iy rioya etish, ayniqsa do‘konlar yaqinida sinov o‘tkazish yoki chekish kabi xavfli harakatlardan tiyilish tavsiya etildi.
