Beshta davlat G‘azoga qo'shin yuboradi
Qozog‘iston ham Xalqaro barqarorlashtirish kuchlari tarkibida xizmat qilish uchun qo‘shin yuborishga tayyorligini bildirdi.
Bir qator davlatlar G‘azo sektorida tashkil etilayotgan Xalqaro barqarorlashtirish kuchlari (ISF) tarkibida ishtirok etish uchun o‘z harbiy bo‘linmalarini yuborishini ma’lum qildi. Bu haqda ISF qo‘mondoni, general-mayor Jasper Jeffers Tinchlik kengashining yig‘ilishida ma’lum qilgan.
Ma’lumotlarga ko‘ra, Indoneziya, Marokash, Qozog‘iston, Kosovo va Albaniya G‘azo sektorida xizmat qilish uchun xalqaro kontingent tarkibiga qo‘shin yuborishga tayyorligini bildirgan. Shuningdek, Misr va Iordaniya politsiya kuchlarini tayyorlash jarayonida ishtirok etishga sodiqligini tasdiqlagan.
ISF kuchlarini dastlab G‘azo sektorining janubiy qismidagi Rafah hududiga joylashtirish rejalashtirilmoqda. Ushbu hududda politsiya tayyorgarligi tashkil etilib, keyinchalik kuchlar bosqichma-bosqich sektorlar kesimida kengaytirilishi ko‘zda tutilgan. Uzoq muddatli rejaga muvofiq, hududga 20 ming nafar harbiy xizmatchi hamda 12 ming nafar politsiya xodimini joylashtirish rejalashtirilgan.
19-fevral kuni Vashington shahrida yangi xalqaro tuzilma — Tinchlik kengashining ilk yig‘ilishi bo‘lib o‘tdi. Yig‘ilishda AQSh prezidenti Donald Tramp bir qator davlatlar, jumladan Qozog‘iston, Ozarbayjon, BAA, Marokash, Bahrayn, Qatar, Saudiya Arabistoni, O‘zbekiston va Quvayt tomonidan G‘azo sektoriga 7 milliard dollardan ortiq yordam ajratilganini ma’lum qildi.
Qozog‘iston prezidenti Qosim-Jomart Toqayev mamlakat xalqaro barqarorlashtirish kuchlari tarkibida harbiy bo‘linmalar, tibbiyot xodimlari hamda kuzatuvchilarni yuborishga tayyorligini tasdiqladi. Uning ta’kidlashicha, fuqarolik-harbiy muvofiqlashtirish doirasida bunday tashabbuslar Yaqin Sharqda xavfsizlik va barqarorlikni mustahkamlashga xizmat qiladi.
