To‘qayev Tramp nomi bilan maxsus mukofot ta’sis etishni taklif qildi
Taklif qilingan mukofot AQSH prezidentining tinchlikni ta’minlashdagi yutuqlarini e’tirof etishga qaratilgan.
Qozog‘iston Prezidenti Qosim-Jomart To‘qayev 19-fevral kuni Vashingtonda bo‘lib o‘tgan Tinchlik Kengashining birinchi yig‘ilishida nutq so‘zladi. Davlat rahbari Yaqin Sharqda barqaror rivojlanish mintaqada tinchlikni ta’minlash, hamkorlikni kengaytirish va ishonchni mustahkamlashga qaratilgan yangi mexanizmlarni talab qilishini ta’kidladi. Bu haqda Tengrinews xabar berdi.
To‘qayev Qozog‘istonning amaliy yordam ko‘rsatishga, jumladan, mamlakatda turli daraja va formatlarda uchrashuvlar o‘tkazishga tayyorligini tasdiqladi.
Davlat rahbari nutqida Tinchlik Kengashi doirasida yangi mukofot ta’sis etishni taklif qildi:
“Shuningdek, men Prezident Trampning tinchlikni ta’minlashdagi ulkan yutuqlarini e’tirof etish maqsadida Tinchlik Kengashi homiyligida uning nomi bilan atalgan maxsus mukofotni ta’sis etishni taklif qilmoqchiman. Ishonchim komilki, sizning kuchli va uzoqni ko‘ra oladigan rahbarligingiz ostida Kengash o‘zining ezgu vazifasini muvaffaqiyatli bajaradi”, — deya xulosa qildi Qozog‘iston prezidenti.
