AQSH Oliy sudi Trampning ayrim tariflarini noqonuniy deb topdi
AQSH prezidenti barcha mamlakatlar importiga 10 foizlik global boj joriy etdi.
AQSH Oliy sudi Donald Trampning import tovarlariga bojlar joriy etish vakolatini ortiqcha ishlatganini bildirib, ayrim tariflarni noqonuniy deb topgan. Sud qarori 6-3 ovoz bilan qabul qilingan. Uch liberal sudya — Ketanji Braun Jekson, Elena Kagan, Sonia Sotomayor — va uch konservativ sudya — Emi Koni Barrett, Nil Gorsuch, Jon Roberts — tariflarni bekor qilishga ovoz bergan. Sudyalar Brett Kavanaugh, Samuel Alito, Klarens Tomas qarshi chiqqan. Bu haqda BBC xabar berdi.
Sud qarorida Tramp milliy favqulodda vaziyatlar to‘g‘risidagi qonunga tayangan holda katta tariflarni joriy etish orqali o‘z vakolatlarini oshirib yuborganligi qayd etilgan. Oliy sud shuningdek, Xalqaro favqulodda iqtisodiy vakolatlar to‘g‘risidagi qonunga binoan prezidentga barcha mamlakatlardan tarif joriy etish vakolati berilmasligini belgilagan.
Qaror eʼlon qilinganidan so‘ng, Tramp noroziligini bildirgan va barcha mamlakatlar importiga 10 foiz global boj joriy etish to‘g‘risida farmon imzolagan. Prezidentning so‘zlariga ko‘ra, 1974 yilgi Savdo to‘g‘risidagi qonunning 122-bo‘limi unga Kongress roziligisiz barcha mamlakatlardan import qilinadigan tovarlarga 150 kungacha 15 foizgacha bojlar joriy etish imkonini beradi.
AQSH Moliya vaziri Skott Bessentning maʼlum qilishicha, Oliy sud prezidentning taʼsirini ayrim jihatlarda cheklagan bo‘lsada, u global tariflarni joriy etish vakolatini saqlab qolgan.
Tramp shuningdek, sud tomonidan bekor qilingan tariflar bo‘yicha kompaniyalarga kompensatsiya to‘lashni rejalashtirmayotgani va bu masala hali Oliy sud tomonidan ko‘rilmaganini taʼkidlagan.
