O'zbekiston fuqarosi AQSH sanksiyasiga uchradi
AQSh bu qarorni noqonuniy kiber faoliyat bilan izohlamoqda.
AQSh Moliya vazirligining Xorijiy aktivlarni nazorat qilish boshqarmasi — OFAC Rossiyaga qarshi sanksiyalar ro‘yxatini kengaytirib, to‘rt nafar shaxs hamda uchta kompaniyani cheklovlar ro‘yxatiga kiritdi. Bu haqda RBC nashri xabar berdi.
Sanksiyalar ro'yxatiga Rossiyada ro‘yxatdan o‘tgan Matrix (Operation Zero) kompaniyasi, shuningdek, BAA hududida joylashgan Advance Security Solutions va Special Technology Services kompaniyalari kiritilgan.
Shuningdek, ro‘yxatga Rossiya fuqarolari Sergey Zelenyuk, Oleg Kucherov, Marina Vasanovich hamda O‘zbekiston fuqarosi Azizjon Mamashoyev kiritilgan.
AQSh rasmiylarining bayonotiga ko‘ra, sanksiyalar noqonuniy kiber faoliyat bilan bog‘liq. Xususan, Sergey Zelenyuk “Operation Zero” loyihasi orqali dasturiy ta’minotdagi zaifliklardan ruxsatsiz kirish, ma’lumotlarni o‘g‘irlash yoki elektron qurilmalarni boshqarish imkonini beruvchi eksploitlarni sotishda gumon qilinmoqda.
Ma’lumotlarga ko‘ra, uning kompaniyasi 2022–2025 yillar oralig‘ida amerikalik mudofaa pudratchisidan o‘g‘irlangan sakkizta eksploitni 1,3 million dollar evaziga sotib olgan.
Marina Vasanovich Zelenyukning yordamchisi sifatida, Special Technology Services esa u tomonidan boshqariladigan tuzilma sifatida sanksiyalar ro‘yxatiga kiritilgan.
AQSh rasmiylari, shuningdek, Azizjon Mamashoyev Advance Security Solutions kompaniyasini nazorat qilishi va ushbu kompaniya ham kiber eksploitlar savdosi bilan shug‘ullangani aytilmoqda.
Bundan tashqari, Oleg Kucherov Trickbot xakerlik guruhi bilan aloqador shaxs sifatida qayd etilgan. AQSh tomoni mazkur choralarni noqonuniy kiber faoliyatga qarshi kurash doirasida qo‘llanilganini ta’kidladi.
